സ്ത്രീവിരുദ്ധ പരാമര്‍ശത്തില്‍ നടന് മന്‍സൂര്‍ അലിഖാന് തിരിച്ചടി. തൃഷ, ഖുശ്ബു, ചിരഞ്ജീവി എന്നിവര്‍ക്കെതിരെയാണ് മന്‍സൂര്‍ മാനനഷ്ടക്കേസ് നല്‍കിയത്. ഒരു കോടി രൂപ നഷ്ടപരിഹാരം തരണമെന്ന മന്‍സൂറിന്റെ പരാതിയില്‍ നേരത്തെ മദ്രാസ് ഹൈക്കോടതി നടനെ ശാസിച്ചിരുന്നു. മന്‍സൂറിന്റെ സ്ത്രീവിരുദ്ധ പരാമര്‍ശത്തില്‍ കേസ് നല്‍കേണ്ടത് തൃഷയാണെന്ന് കഴിഞ്ഞയാഴ്ച കോടതി അഭിപ്രായപ്പെട്ടിരുന്നു.
മന്‍സൂര്‍ അലി ഖാന് പിഴ ചുമത്തിയാണ് ഇപ്പോള്‍ കേസ് തളളിയത്. പ്രശസ്തിക്ക് വേണ്ടിയാണ് മന്‍സൂര്‍ കേസുമായി കോടതിയെ സമീപിച്ചത് എന്ന് കോടതി വിമര്‍ശിച്ചു. മന്‍സൂറിന് ഒരു ലക്ഷം രൂപയാണ് കോടതി പിഴ ചുമത്തിയത്. പണം അടയാര്‍ ക്യാര്‍സര്‍ സെന്ററിന് കൈമാറാനും നിര്‍ദ്ദേശിച്ചു.
എക്‌സ് പ്ലാറ്റഫോമിലൂടെ തന്നെ അപകീര്‍ത്തിപ്പെടുത്തിയെന്ന് ആരോപിച്ചാണ് തൃഷക്കെതിരെ മന്‍സൂര്‍ അലി ഖാന് പരാതി നല്‍കിയത്. ദേശീയ വനിത കമ്മീഷന്‍ അംഗം ഖുശ്ബു, നടന് ചിരഞ്ജീവി എന്നിവര്‍ക്കെതിരെയും ചെന്നൈ കോടതിയില്‍ മന്‍സൂര്‍ കേസ് നല്‍കിയിരുന്നു.’ലിയോ’ സിനിമയുമായി ബന്ധപ്പെട്ടുള്ള അഭിമുഖത്തിനിടെ തൃഷയ്‌ക്കെതിരെ മന്‍സൂര്‍ നടത്തിയ സ്ത്രീവിരുദ്ധ പരാമര്‍ശം വിവാദമായിരുന്നു.
