തിരുവനന്തപുരം: ചലച്ചിത്ര അക്കാദമി ചെയര്‍മാന്‍ സ്ഥാനം രാജിവയ്‌ക്കില്ലെന്ന് സംവിധായകന്‍ രഞ്ജിത്ത്. ചലച്ചിത്ര അക്കാദമിയില്‍നിലവില്‍ ഭിന്നിപ്പില്ലെന്നും സമാന്തര യോഗം ചേര്‍ന്നിട്ടില്ലെന്നും രഞ്ജിത്ത് പറഞ്ഞു.
ചലച്ചിത്ര അക്കാദമിയുടെ നിര്‍വാഹക സമിതിയില്‍ ഒരു അംഗത്തെക്കൂടി ഉള്‍പ്പെടുത്തി വിപുലപ്പെടുത്തുമെന്ന് രഞ്ജിത്ത് അറിയിച്ചു. ജനറല്‍ കൗണ്‍സില്‍ അംഗമായ കുക്കു പരമേശ്വരനെയാണ് ഉള്‍പ്പെടുത്തുക. ചെയര്‍മാന്‍ സ്ഥാനം രാജി വയ്‌ക്കേണ്ട സാഹചര്യം നിലവില്ല.
ചെയര്‍മാന്‍ സ്ഥാനത്തുനിന്ന് രഞ്ജിത്തിനെ നീക്കണമെന്ന് ആവശ്യപ്പെട്ട് അക്കാദമി അംഗങ്ങള്‍ സമാന്തരയോഗം ചേര്‍ന്നന്നെന്ന് വാര്‍ത്ത വന്നിരുന്നു. ഒമ്പത് അംഗങ്ങള്‍ പ്രത്യേക യോഗം ചേര്‍ന്ന് രഞ്ജിത്തിനെ മാറ്റണമെന്ന് ആവശ്യപ്പെട്ട് സര്‍ക്കാരിന് കത്തും നല്‍കി.
സംവിധായകന്‍ ഡോ. ബിജുവിനെക്കുറിച്ച് രഞ്ജിത്ത് നടത്തിയ പരാമര്‍ശങ്ങള്‍ വിവാദമായതിന് പിന്നാലെയാണ് രഞ്ജിത്തിനെതിരെ അംഗങ്ങള്‍ തിരിഞ്ഞത്.
ഡോ ബിജുവിനെതിരെ തന്റെ വീട്ടില്‍ വച്ചാണ് പരാമര്‍ശങ്ങള്‍ നടത്തിയതെന്നും ചലച്ചിത്ര അക്കാദമി ചെയര്‍മാന്റെ കസേരയിലിരുന്നായിരുന്നില്ലെന്നും രഞ്ജിത്ത് പ്രതികരിച്ചു.
