കൊച്ചി: ശബരിമലയിലെ തിരക്ക് നിയന്ത്രിക്കുന്നതുമായി ബന്ധപ്പെട്ട് ഹൈക്കോടതിയുടെ ഇടപെടല്. ദര്ശന സമയം കൂട്ടാന് കഴിയുമോ എന്ന് അറിയിക്കാന് കോടതി നിര്ദ്ദേശം നല്കി. 17 മണിക്കൂര് എന്നത് രണ്ട് മണിക്കൂര് കൂടി ദര്ശന സമയം കൂട്ടാന് കഴിയുമോ എന്നാണ് ചോദ്യം. ഇക്കാര്യം ശബരിമല തന്ത്രിയുമായി ആലോചിച്ചു തീരുമാനം അറിയിക്കണമെന്ന് ദേവസ്വം ബോര്ഡിന് നിര്ദ്ദേശം നല്കി.
പുലര്ച്ചെ മൂന്നിന് നട തുറന്നത് മുതല് ദര്ശനത്തിനായി തീര്ഥാടകരുടെ നീണ്ട നിരയാണ്. വെര്ച്വല് ക്യൂ സംവിധാനം മുഖേനെ ഇന്ന് 90000 ഭക്തരാണ് ദര്ശനത്തിനെത്തിയത്. ഈ സാഹചര്യത്തിലാണ് ഹൈക്കോടതി സ്വമേധയാ കേസ് പരിഗണിച്ചത്.
ഓണ്ലൈന് വഴി 90000 പേര് ബുക്കിങ് നടത്തുന്നുവെന്ന് പറഞ്ഞ കോടതി, ഈ സാഹചര്യത്തില് ദര്ശനം നടത്താന് കഴിയുക 76,500 പേര്ക്ക് മാത്രമാണെന്നും പറഞ്ഞു. മിനിറ്റില് 75 പേര് വച്ച് പതിനെട്ടാം പടി കയറുന്നുവെന്നും ഹൈക്കോടതി ചൂണ്ടിക്കാട്ടി.
നിലവില് ഒരു ലക്ഷത്തില് കൂടുതല് പേര് ദര്ശനം നടത്തുന്നുവെന്ന് കോടതി ചൂണ്ടിക്കാട്ടി. തിരക്ക് എങ്ങനെ നിയന്ത്രിക്കും എന്നതില് ക്രമസമാധാന ചുമതലയുള്ള എഡിജിപി റിപ്പോര്ട്ട് നല്കണം. ഓണ്ലൈന് ബുക്കിങ്, സ്പോര്ട് ബുക്കിങ് എന്നിവ എങ്ങനെ നിയന്ത്രിക്കാം എന്ന് അറിയിക്കണം.
വരുംദിവസങ്ങളിലും തിരക്ക് കൂടാന് സാധ്യതയുള്ളതിനാല് സി.ആര്.പി.എഫിനെ ഉപയോഗിച്ച് തിരക്ക് നിയന്ത്രിച്ചുകൂടേ എന്ന് കോടതി ചോദിച്ചു. ശബരിമല സ്പെഷ്യല് കമ്മീഷണറോട് സന്നിധാനത്ത് തുടരാനും കോടതി നിര്ദ്ദേശിച്ചു.
ഒരുലക്ഷത്തിലധികം ഭക്തരാണ് ഇന്നലെ ദര്ശനം നടത്തിയത്. വരുംദിവസങ്ങളില് ഇതില് കൂടുതല് പേര് എത്തുമെന്നാണ് കണക്കാക്കുന്നത്. ഈ സാഹചര്യത്തിലാണ് ഹൈക്കോടതി അടിയന്തിരമായി വിഷയത്തില് ഇടപെട്ട് സിറ്റിങ് നടത്തിയത്.
