ന്യൂദൽഹി: രാജ്യത്ത് ആദ്യമായി, അത്യാധുനിക തദ്ദേശീയ സാങ്കേതികവിദ്യയിലൂടെ വനമേഖലകളിലെ റെയിൽവേ ട്രാക്കുകളിൽ ട്രെയിനിടിച്ച് ആനകൾ ചെരിയുന്ന സംഭവങ്ങൾ തടയാൻ ‘ഗജരാജ് സുരക്ഷാ (ആന സുരക്ഷ) സംവിധാനം’ ഇന്ത്യൻ റെയിൽവേ വിജയകരമായി വികസിപ്പിച്ചു. പൈലറ്റ് പ്രോജക്റ്റ് എന്ന നിലയിൽ കഴിഞ്ഞ ഒരു വർഷമായി നിരവധി പരീക്ഷണങ്ങൾക്ക് ശേഷം ഇപ്പോൾ വിജയിച്ച സാങ്കേതികവിദ്യ, പല സംസ്ഥാനങ്ങളിലെയും വനമേഖലകളിൽ ട്രെയിനുകൾ ഇടിച്ച് ആനകൾ ചരിയുന്നത് ഒരു പരിധി വരെ ഒഴിവാക്കാനാവും.
റെയിൽ പാളങ്ങളിൽ സംശയാസ്പദമായ ചലനമുണ്ടായാൽ ലോക്കോ പൈലറ്റുമാർക്ക് മുൻകൂട്ടി സന്ദേശം നൽകുന്ന സംവിധാനമാണ് ഗജരാജ്. അസമിൽ വിജയകരമായി പരീക്ഷിച്ച ഗജരാജ്, രാജ്യത്തെ വിവിധ സംസ്ഥാനങ്ങളിലെ ആന ഇടനാഴികളിൽ വരുന്ന എട്ട് മാസത്തിനുള്ളിൽ വിന്യസിക്കുമെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചു. 181 കോടി രൂപയാണ് ഇതിന് ചെലവ് വരുന്നത്.
ട്രാക്കിൽ 200 മീറ്റർ അകലെ വെച്ച് തന്നെ ഗജരാജ് ആനകളുടെ സാന്നിധ്യം ലോക്കോ പൈലറ്റുമാരെ അറിയിക്കും. ആനകളുടെ ചലനവും റെയിൽപ്പാളത്തിന്റെ ശബ്ദവ്യതിയാനവും കൂടിച്ചേർന്ന് ഉണ്ടാകുന്ന പ്രകമ്പനങ്ങൾ തിരിച്ചറിഞ്ഞാണ്, സിഗ്നലുകളിൽ ഉണ്ടാകുന്ന വ്യതിയാനങ്ങൾ മനസ്സിലാക്കി ഗജരാജ് സന്ദേശങ്ങൾ നൽകുക. വരും കാലങ്ങളിൽ മറ്റ് ജീവികളുടെയും മനുഷ്യരുടെയും സാന്നിദ്ധ്യവും ഈ സംവിധാനം ഉപയോഗിച്ച് തിരിച്ചറിയാൻ സാധിക്കും.
കഴിഞ്ഞ മൂന്ന് വർഷത്തിനിടെ രാജ്യത്തിന്റെ വിവിധ ഭാഗങ്ങളിലായി 45 ആനകൾ ട്രെയിനിടിച്ച് ചെരിഞ്ഞിരുന്നു. പശ്ചിമ ബംഗാളിലെ ആലിപുർദാറിൽ അടുത്തയിടെ പിടിയാനയും രണ്ട് ആനക്കുട്ടികളും ട്രെയിനിടിച്ച് ചെരിഞ്ഞ സംഭവം വേദനാജനകമായിരുന്നുവെന്ന് കേന്ദ്ര റെയിൽ മന്ത്രി പറഞ്ഞു. ഈ സംഭവമാണ് അടിയന്തിരമായി ഇത്തരമൊരു നീക്കത്തിന് പ്രേരിപ്പിച്ചതെന്നും അദ്ദേഹം അറിയിച്ചു.
ആനകൾ കൂടുതലുള്ള പശ്ചിമ ബംഗാൾ, ഒഡിഷ, ഝാർഖണ്ഡ്, അസം, കേരളം, ഛത്തീസ്ഗഢ്, തമിഴ്നാട് എന്നീ സംസ്ഥാനങ്ങളിലായിരിക്കും സംവിധാനം ആദ്യം നിലവിൽ വരികയെന്നും റെയിൽവേ മന്ത്രാലയം വ്യക്തമാക്കി. മറ്റുള്ള സംസ്ഥാനങ്ങളിലും കാലക്രമത്തിൽ സംവിധാനം ലഭ്യമാകും.
