വിശാഖപട്ടണം: ആന്ധ്രയിലെ വിശാഖപട്ടണം മത്സ്യബന്ധന തുറമുഖത്ത് വൻ തീപിടിത്തം. 40-ൽ അധികം ബോട്ടുകൾ കത്തി നശിച്ചതായാണ് പുറത്തു വരുന്ന വിവരം. ഇന്നലെ രാത്രി 11.30-യോടെയായിരുന്നു സംഭവം. 40 കോടിയോളം രൂപയുടെ നാശനഷ്ടമുണ്ടായതായാണ് പ്രാഥമിക നിഗമനം. തീപിടിത്തം ഉണ്ടായതിന് പിന്നിലെ കാരണം വ്യക്തമല്ല.
തുറമുഖത്തുണ്ടായിരുന്ന ഒരു ബോട്ടിലാണ് ആദ്യം തീപിടിച്ചത്. ഇതിൽ നിന്നും തൊട്ടടുത്തുള്ള ബോട്ടുകളിലേക്കും തീപടർന്നുവെന്ന് പോലീസ് പറയുന്നു. പോലീസ് ഉദ്യോഗസ്ഥരും അഗ്നി രക്ഷാ സേനയും ഉടൻ തന്നെ സ്ഥലത്തെത്തിയതിനാൽ ആളപായമുണ്ടായില്ല.
നിലവിൽ തീ നിയന്ത്രണ വിധേയമാണെന്നാണ് പുറത്തു വരുന്ന റിപ്പോർട്ടുകൾ. സംഭവത്തിൽ വിശാഖപട്ടണം പോലീസ് കേസെടുത്ത് അന്വേഷണം ആരംഭിച്ചു.
