വ്യക്തിഗത വായ്പയുമായി ബന്ധപ്പെട്ട് പുതിയ നിയമങ്ങൾ കർശനമാക്കി റിസർവ് ബാങ്ക് ഓഫ് ഇന്ത്യ. വ്യക്തിഗത-ക്രെഡിറ്റ് കാർഡ് വായ്പകൾ സുരക്ഷിതമല്ലാത്ത സാഹചര്യം വർദ്ധിച്ചതിനെ തുടർന്നാണ് നടപടി. ബാങ്കുകൾക്കും ബാങ്കിംഗ് ഇതര ധനകാര്യ സ്ഥാപനങ്ങൾക്കും ആർബിഐ ഇത് സംബന്ധിച്ച് പല തവണ മുന്നറിയിപ്പ് നൽകിയിരുന്നു. ഇപ്പോഴിതാ നടപടിയുടെ ഭാഗമായി വായ്പകളുടെ റിസ്ക് വെയിറ്റിംഗ് ഉയർത്തിയിരിക്കുകയാണ് ആർബിഐ.
സുരക്ഷിതമല്ലാത്ത വ്യക്തിഗത വായ്പകളുമായി ബന്ധപ്പെട്ട നിയമങ്ങളാണ് ആർബിഐ കർശനമാക്കിയിരിക്കുന്നത്. റിസ്ക് വെയിറ്റിംഗ് 100 ശതമാനത്തിൽ നിന്നും 125 ആയി വർദ്ധിപ്പിച്ചിട്ടുണ്ട്. ഭവനവായ്പ, വിദ്യാഭ്യാസ വായ്പ, വാഹന വായ്പ, സ്വർണ പണയ വായ്പ എന്നിവയ്ക്ക് പുതുക്കിയ നിയമങ്ങൾ ബാധകമല്ല.
വ്യക്തിഗത വായ്പയ്ക്കുള്ള നിയമങ്ങൾ
സുരക്ഷിതമല്ലാത്ത വ്യക്തിഗത വായ്പകളുടെ കാര്യത്തിൽ ബാങ്കുകൾ കൂടുതൽ തുകയുടെ പ്രത്യേക പ്രൊവിഷൻ ചെയ്യേണ്ടി വരും എന്നതാണ് റിസ്ക് വെയിറ്റിംഗ് എന്നതുകൊണ്ട് അർത്ഥമാക്കുന്നത്. പുതുക്കിയ മാനദണ്ഡങ്ങൾ ഉടൻ പ്രാബല്യത്തിൽ വരുമെന്ന് ആർബിഐ വ്യക്തമാക്കി. ഇത് പുതിയതായി എടുക്കുന്നതും കുടിശ്ശിക ഉള്ളതുമായ വായ്പകൾക്ക് ബാധകമാണ്.
