തിരുവനന്തപുരം: നെയ്യാറ്റിൻകരയിൽ പോളിടെക്നിക് വിദ്യാർത്ഥിക്ക് നേരെ ക്രൂര മർദ്ദനം ഏറ്റതായി പരാതി. റാഗിംഗിനിടെ സീനിയർ വിദ്യാർത്ഥികൾ മർദ്ദിക്കുകയായിരുന്നുവെന്നാണ് പരാതി. ഒന്നാം വർഷ പോളിടെക്നിക് ഇൻസ്ട്രുമെന്റേഷൻ വിദ്യാർത്ഥി അനൂപിനാണ് മർദ്ദനമേറ്റത്. തിരുവനന്തപുരം നെയ്യാറ്റിൻകര പെരുമ്പഴുതൂരിലാണ് സംഭവം.
ചൊവ്വാഴ്ച ഉച്ചയ്ക്ക് ഒന്നരയോടെയായിരുന്നു സംഭവം. ചെങ്കൽ സ്വദേശിയായ അനൂപിനെ സീനീയർ വിദ്യാർത്ഥികൾ ചേർന്ന് മർദ്ദിക്കുകയായിരുന്നു. ക്ലാസ് മുറിയിൽ വെച്ചായിരുന്നു മർദ്ദനം. കുട്ടിയുടെ സ്വകാര്യ ഭാഗത്തും മർദ്ദനമേറ്റിട്ടുണ്ട്. സീനിയർ വിദ്യാർത്ഥികളായ എബിൻ, ആദിത്യൻ, അനന്ദു, കിരൺ കൂടാതെ കണ്ടാൽ അറിയുന്ന ഇരുപതോളം പേർ ചേർന്നാണ് മർദിച്ചതെന്ന് അനൂപ് പറയുന്നു.
സംഭവത്തിൽ സീനിയർ വിദ്യാർത്ഥിക്കൾക്കെതിരെ അനൂപ് പ്രിൻസിപ്പലിന് പരാതി നൽകി. പ്രിൻസിപ്പൽ നെയ്യാറ്റിൻകര പൊലീസിനെ സമീപിക്കുകയായിരുന്നു. പ്രിൻസിപ്പലിന്റെ പരാതിയിൽ പോലീസ് കേസ് എടുത്തിട്ടുണ്ട്. എബിൻ, ആദിത്യൻ, അനന്ദു, കിരൺ എന്നിവരെ അന്വേഷണ വിധേയമായി കോളജിൽ നിന്ന് സസ്പെൻഡ് ചെയ്തു.
