പെരുമ്പാവൂര്: പ്രധാനമന്ത്രി നരേന്ദ്രമോദിയുടെ പ്രത്യേക അഭിനന്ദന കത്തുകള് ലഭിച്ചതിന്റെ സന്തോഷത്തിലാണ് പെരുമ്പാവൂരിനടുത്ത് കോടനാട് ബസേലിയോസ് പബ്ലിക് സ്കൂളിലെ വിദ്യാര്ഥികളും അധ്യാപകരും. പ്രധാനമന്ത്രി വിദ്യാര്ഥികള്ക്കായി കഴിഞ്ഞവര്ഷം സംഘടിപ്പിച്ച പരീക്ഷ പേ ചര്ച്ചയില് പങ്കെടുത്ത് ക്രിയാത്മകമായ അഭിപ്രായങ്ങള് അറിയിച്ചവര്ക്ക് നന്ദി പറയുന്നതിന്റെ ഭാഗമായിട്ടാണ് അനുമോദന കത്തുകള് ലഭിച്ചത്.
ഭാരതത്തിന്റെ പുനര്നിര്മാണത്തെ കുറിച്ചാണ് പ്രധാനമന്ത്രി വിദ്യാര്ഥികളോട് പ്രധാനമായും അഭിപ്രായങ്ങള് ആരാഞ്ഞത്. കഴിഞ്ഞവര്ഷത്തെ പത്താം ക്ലാസ് വിദ്യാര്ഥികളായ 13 കുട്ടികളാണ് സ്കൂളിനെ പ്രതിനിധീകരിച്ച് പരിപാടിയില് പങ്കെടുത്തത്. ഇവരുമായി പ്രധാനമന്ത്രി സംവദിക്കുകയും അവരുടെ അഭിപ്രായങ്ങള് ക്രോഡീകരിച്ചെടുക്കുകയും ചെയ്തു. ഇവര്ക്ക് വ്യക്തിപരമായി ഓരോരുത്തര്ക്കും അഭിനന്ദന സര്ട്ടിഫിക്കറ്റുകള് ലഭിച്ചു. ഭാരതത്തിന്റെ മുന്നോട്ടുള്ള പ്രയാണത്തെക്കുറിച്ചും അദ്ദേഹത്തിന്റെ സ്വപ്നങ്ങളെക്കുറിച്ചും വിദ്യാര്ഥികളുമായി പ്രധാനമന്ത്രി സംവദിച്ചിരുന്നു. അടുത്ത 25 വര്ഷം ഇന്ത്യയുടെ അമൃതകാലമാണെന്നും മഹത്തായതും വികസിതവും കഴിവുറ്റതുമായ രാഷ്ട്രം കെട്ടിപ്പടുക്കുവാന് യുവാക്കളുടെ സാന്നിധ്യം ഉണ്ടാകണമെന്നും പ്രധാനമന്ത്രി കത്തിലൂടെ ആഹ്വാനംചെയ്തു.
സമൃദ്ധമായ ഭാരതത്തിനായി 5 പ്രതിജ്ഞകളും പ്രധാനമന്ത്രി വിദ്യാര്ഥികള്ക്ക് കൈമാറി.വികസിത ഭാരതം എന്ന ബൃഹത്തായ ദൃഢനിശ്ചയവും അടിമത്ത മനോഭാവത്തില് നിന്നുള്ള മോചനവും നമ്മുടെ പൈതൃകത്തില് അഭിമാനവും
ഐക്യം ശക്തിപ്പെടുത്തികര്ത്തവ്യത്തില് ഊന്നിയ മുന്ഗണനയോടെ മുന്നേറാം എന്ന അഞ്ച് പ്രതിജ്ഞകള് ആണ് അദ്ദേഹം യുവാക്കള്ക്ക് കൈമാറിയത്.ജീവിതത്തിന്റെ എല്ലാ പരീക്ഷകളിലും ഉന്നത വിജയം ഉണ്ടാകട്ടെ എന്ന് ആശംസിച്ചുകൊണ്ട് ഹിന്ദിയില് ഒപ്പിട്ട കത്താണ് വിദ്യാര്ഥികള്ക്ക് ലഭിച്ചത്.
ഈ വിവരം അറിഞ്ഞ് സ്കൂളില് എത്തിയ ബിജെപി സംസ്ഥാന സെക്രട്ടറി ഡോ. രേണു സുരേഷും ബിജെപി പഞ്ചായത്ത് പ്രസിഡന്റ് പി.ടി ഗോപകുമാറും പ്രാദേശിക നേ
താക്കളും സ്കൂളില് മധുര പലഹാര വിതരണം നടത്തി. ഇന്ന് ഉച്ചയ്ക്ക് 12 ന് സ്കൂളില് നടക്കുന്ന പ്രത്യേക അനുമോദന യോഗത്തില് സര്ട്ടിഫിക്കറ്റുകള് വിതരണം ചെയ്യുമെന്ന് സ്കൂള് മാനേജര് തോമസ് പോള് റമ്പാന് അറിയിച്ചു
