തിരുവനന്തപുരം: കേരള പബ്ലിക് എന്റര്പ്രൈസസ് റിക്രൂട്ട്മെന്റ് ബോര്ഡ് ചെയര്മാനായി നിയമിതനായ മുന് ചീഫ് സെക്രട്ടറി വി.പി. ജോയിക്ക് പുതിയ പദവിയില് ലഭിക്കുന്ന ശമ്പളം വ്യക്തമാക്കാതെ റിക്രൂട്ട്മെന്റ് ബോര്ഡും സര്ക്കാരും. ശമ്പളം, നിയമനം സംബന്ധിച്ച ചോദ്യങ്ങള് വിവരാവകാശ നിയമത്തിന്റെ പരിധിയില് വരില്ലെന്നാണ് റിക്രൂട്ട്മെന്റ് ബോ
ര്ഡിന്റെ നിലപാട്.
സമാനമായി സര്വീസില് നിന്നും വിരമിച്ച ശേഷം ഇതര സ്ഥാപനങ്ങളില് നിയമിക്കപ്പെട്ടിട്ടുള്ള ഐഎഎസ്, ഐപിഎസ്, ഉദ്യോഗസ്ഥന്മാര്ക്ക് അവര് കൈപ്പറ്റുന്ന പെന്ഷന് ഒഴിവാക്കിയുള്ള ശമ്പളമാണ് അനുവദിച്ചിട്ടുള്ളതെന്ന മറുപടി നല്കിയിരിക്കുമ്പോഴാണ് വി.പി. ജോയിയുടെ ശമ്പളം സംബന്ധിച്ച വിവരങ്ങള് മറച്ച് വയ്ക്കുന്നത്.
എന്നാല് വിരമിച്ച ശേഷം വിവിധ വകുപ്പുകളില് പുനര് നിയമനം നല്കിയ ഐഎഎസ് ഉദ്യോഗസ്ഥരായ വി. തുളസിദാസ്, എ. അലക്സാണ്ടര്, നീല ഗംഗാധരന്, ശോഭ കോശി, പി.എച്ച്. കുര്യന്, ഡോ. സന്തോഷ് ബാബു, ആര്. ഗിരിജ, ടി. ഭാസ്ക്കരന്, എന്. പദ്മകുമാര്, ഷെയ്ഖ് പരീത്, ഉഷ ടൈറ്റസ് തുടങ്ങിയവര്ക്ക് പെന്ഷന് കഴിച്ചുള്ള തുകയാണ് ശമ്പളമായി അനുവദിച്ചതെന്ന് വിവിധ വകുപ്പുകള് വിവരാവകാശ പ്രകാരം ഇതിനകം മറുപടി നല്കിയിട്ടുണ്ട്.
സര്വ്വകലാശാല വിസി മാര്ക്കും പെന്ഷന് ഒഴിവാക്കിയുള്ള തുകയാണ് അനുവദിച്ചിട്ടുള്ളത്. എന്നാല് വി.പി. ജോയിയെപ്പോലെ പെന്ഷനോടൊപ്പം പുതിയ പദവിയില് ശമ്പളം കൈപ്പറ്റുന്ന വിരമിച്ച ഐഎഎസ്കാരെ സംബന്ധിച്ച രേഖകള് നല്കുന്നില്ല.
റിക്രൂട്ട്മെന്റ് ബോര്ഡ് ചെയര്മാനായി നിയമനം ലഭിച്ച മുന് ചീഫ് സെക്രട്ടറി വി.പി. ജോയിക്ക് ഇപ്പോള് ആറുലക്ഷത്തോളം രൂപ പ്രതിമാസം ലഭിക്കുന്നെന്നാണ് വിവരം. ഇത് സംബന്ധിച്ച് സേവ് യൂണിവേഴ്സിറ്റി ക്യാമ്പയിന് കമ്മിറ്റി ചെയര്മാന് നല്കിയ അപേക്ഷയാണ് നിരസിക്കപ്പെട്ടത്.
