ഇന്ത്യയില് നടക്കുന്ന ഏകദിന ലോകകകപ്പില് മികച്ച ബൗളിംഗ് പ്രകടനവുമായി തിളങ്ങുകയാണ് മൊഹമ്മദ് ഷമി.ടൂര്ണമെന്റില് ഇതുവരെ നാല് മത്സരങ്ങളില് നിന്ന് 16 വിക്കറ്റുകള് വീഴ്ത്തി കഴിഞ്ഞു താരം.
ഇതോടെ ആരാധകര് മൊഹമ്മദ് ഷമിയെ പ്രശംസ കൊണ്ടു മൂടുകയാണ്. ഇതിനിടെയാണ് താരത്തോട് ബോളിവുഡ് സുന്ദരിയുടെ വിവാഹാഭ്യര്ത്ഥന. എന്നാല് ചുമ്മാ അങ്ങ് വിവാഹം കഴിക്കാമെന്നല്ല. ഷമി ഇംഗ്ലീഷ് മെച്ചപ്പെടുത്തണം. എങ്കില് വിവാഹം കഴിക്കാമെന്നാണ് നടി സമൂഹ മാധ്യമമായ എക്സില് കുറിച്ചത്.
അതേസമയം, പായല് ഘോഷിന്റെ വിവാഹാഭ്യര്ത്ഥനയോട് മൊഹമ്മദ് ഷമി ഇതുവരെ പ്രതികരിച്ചിട്ടില്ല. 1992ല് കൊല്ക്കത്തയില് ജനിച്ച ബോളിവുഡ് നടിയാണ് പായല് ഘോഷ്. സെന്റ് പോള്സ് മിഷന് സ്കൂളില് പഠിച്ച നടി സ്കോട്ടിഷ് ചര്ച്ച് കോളജില് നിന്ന് പൊളിറ്റിക്കല് സയന്സില് ബിരുദം നേടി.
#Shami Tum apna English sudharlo, I’m ready to marry you 🤣🤣
— Payal Ghoshॐ (@iampayalghosh) November 2, 2023
ചന്ദ്രശേഖര് യെലേറ്റിയുടെ ‘പ്രയാണം’ എന്ന സിനിമയിലൂടെ സിനിമാഭിനയം ആരംഭിച്ച പായല്, വര്ഷാധരേ, ഊസരവള്ളി, മിസ്റ്റര് റാസ്കല്, പട്ടേല് കി പഞ്ചാബി ഷാദി തുടങ്ങിയ സിനിമകളില് വേഷമിട്ടു. കേന്ദ്ര മന്ത്രിയായ രാംദാസ് അതാവലെയുടെ റിപ്പബ്ലിക്കന് പാര്ട്ടി ഓഫ് ഇന്ത്യയുടെ വനിതാ വിഭാഗം വൈസ് പ്രസിഡന്റാണിപ്പോള് പായല് ഘോഷ്.
ഇതിനിടെ ഷമിയുടെ ആദ്യ ഭാര്യ ഹസിന് ജഹാന് ഒരു വാര്ത്താ ചാനലിന് നല്കിയ അഭിമുഖത്തില് ഇന്ത്യന് ടീമിന് ആശംസ നേര്ന്നു. എന്നാല് ഷമിക്ക് ആശംസ നേരില്ലെന്നും അവര് പറഞ്ഞു.
മുഹമ്മദ് ഷമിയും ഹസിന് ജഹാനും 2014ലാണ് വിവാഹിതരായത്. തൊട്ടടുത്ത വര്ഷം ജൂലൈയില് ദമ്പതികള്ക്ക് മകള് ജനിച്ചു. എന്നാല് പിന്നീട് ഇരുവരും വേര്പിരിഞ്ഞു. വ്യഭിചാരം, വൈവാഹിക ബലാത്സംഗം, ഒത്തുകളി, ഗാര്ഹിക പീഡനം എന്നിവയുള്പ്പെടെ നിരവധി ഗുരുതരമായ ആരോപണങ്ങളാണ് ഹസിന്, ഷമിക്കെതിരെ ഉന്നയിച്ചത്. എല്ലാ ആരോപണങ്ങളും മൊഹമ്മദ് ഷമി ശക്തമായി നിഷേധിച്ചെങ്കിലും ഹസിന് മകളുമായി താമസം മാറി.
