തിരുവനന്തപുരം: തിരുവനന്തപുരം ആര്മി റിക്രൂട്ടിങ് ഓഫീസ് സംഘടിപ്പിക്കുന്ന അഗ്നിവീര് റിക്രൂട്ട്മെന്റ് റാലി നവംബര് 16 മുതല് 25 വരെ എറണാകുളം മഹാരാജാസ് കോളജ് സ്റ്റേഡിയത്തില് നടത്തും.
2023 ഏപ്രില് 17 മുതല് 24 വരെ നടത്തിയ ഓണ്ലൈന് കോമണ് എന്ട്രന്സ് പരീക്ഷയില് യോഗ്യത നേടിയ കേരള, കര്ണാടക സംസ്ഥാനങ്ങളില് നിന്നും ലക്ഷദ്വീപ്, മാഹി എന്നീ കേന്ദ്രഭരണ പ്രദേശങ്ങളില് നിന്നുമുള്ള യുവാക്കളാണ് ഈ റാലിയില് പങ്കെടുക്കുന്നത്.
കേരളത്തിലെ ഏഴ് തെക്കന് ജില്ലകളായ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം എന്നീ ജില്ലകളിലെ ഉദ്യോഗാര്ത്ഥികള്ക്കായി അഗ്നിവീര് ജനറല് ഡ്യൂട്ടി, അഗ്നിവീര് ടെക്നിക്കല്, അഗ്നിവീര് ക്ലാര്ക്ക്/സ്റ്റോര് കീപ്പര് ടെക്നിക്കല്, അഗ്നിവീര് ട്രേഡ്സ്മാന് എന്നീ തസ്തികകളിലേക്കാണ് തിരഞ്ഞെടുപ്പ് നടത്തുന്നത്.
കൂടാതെ, കേരള, കര്ണാടക സംസ്ഥാനങ്ങളില് നിന്നും ലക്ഷദ്വീപ്, മാഹി എന്നീ കേന്ദ്രഭരണ പ്രദേശങ്ങളില് നിന്നുമുള്ള ഉദ്യോഗാര്ത്ഥികള്ക്കായി സോള്ജിയര് നഴ്സിങ് അസിസ്റ്റന്റ്/ നഴ്സിങ് അസിസ്റ്റന്റ് വെറ്റിനറി, ശിപായി ഫാര്മ, റിലീജിയസ് ടീച്ചര് ജൂനിയര് കമ്മീഷന്ഡ് ഓഫീസര്, ഹവില്ദാര് സര്വേയര് ഓട്ടോ കാര്ട്ടോ എന്നീ വിഭാഗങ്ങളിലേക്കുമാണ് ഈ റാലി സംഘടിപ്പിച്ചിരിക്കുന്നത്. ഷോര്ട്ട്ലിസ്റ്റ് ചെയ്ത ഉദ്യോഗാര്ത്ഥികളുടെ അഡ്മിറ്റ് കാര്ഡുകള് ഇതിനകം രജിസ്റ്റര് ചെയ്ത ഇമെയില് ഐഡികളിലേക്ക് അയച്ചിട്ടുണ്ട്.
