കോഴിക്കോട്: മീഡിയ വൺ ലേഖികയോട് മോശമായി പെരുമാറിയെന്ന പ്രചരണത്തിൽ സുരേഷ് ഗോപിക്ക് പിന്തുണയേറുന്നു. മാധ്യമപ്രവര്ത്തക പീഡനവകുപ്പ് ചേര്ത്ത് പരാതി നല്കിയതിന് പിന്നില് രാഷ്ട്രീയ ലക്ഷ്യമുണ്ടെന്ന് ബിജെപി നേതാവ് ശോഭാ സുരേന്ദ്രൻ. ക്ഷമ ചോദിച്ചതോടെ പ്രശ്നം അവസാനിപ്പിക്കേണ്ടിയിരുന്നു. ഗൂഢാലോചനയോടെ പെരുമാറുന്നുവെന്നും അവര് പറഞ്ഞു.
വെള്ളിയാഴ്ച വൈകീട്ട് നാലുമണിവരെ ഒരു പ്രശ്നവും ഉണ്ടായിരുന്നില്ല. വിഷയം രാഷ്ട്രീയവത്കരിക്കുകയാണ്. എന്താണ് പിറകില് നടന്നതെന്ന് നിങ്ങള്ക്ക് തന്നെ ബോധ്യമുണ്ട്. തങ്ങളുടെ നിലപാടില് ഒരു സ്ത്രീവിരുദ്ധതയുമില്ല. ആ വീഡിയോ ക്ലിപ്പ് 12 തവണയിലധികം കണ്ടയാളാണ് താൻ. രണ്ടുചോദ്യം ചോദിക്കുമ്പോഴും മാധ്യമപ്രവര്ത്തകയുടെ മുഖത്ത് കണ്ടത് സ്നേഹംതന്നെയാണ്. അവര് തന്റേയും സുഹൃത്താണെന്നും ശോഭാ സുരേന്ദ്രന് പറഞ്ഞു.
മാധ്യമപ്രവര്ത്തകയെ മുന്നിര്ത്തി അവരറിയാതെ ഇടതുപക്ഷം രാഷ്ട്രീയനാടകം കളിക്കുകയാണ്. ഇതുമായി ബന്ധപ്പെട്ട് ചേര്ന്ന യോഗങ്ങളുടെ വിശദാംശങ്ങള് അറിയിക്കാൻ തങ്ങള്ക്കും ഇടതുപക്ഷത്ത് ആളുകള് ഉണ്ട്. അടച്ചിട്ട മുറിയില് ഇടതുപക്ഷം നടത്തുന്ന പല വിഷയങ്ങള് പുറത്തേക്ക് പോകുന്നുണ്ട്. കരുവന്നൂരില് നടത്തിയതിന്റെ പ്രതികാരം തീര്ക്കുകയാണ് സി.പി.എം. മാധ്യമപ്രവര്ത്തകയ്ക്ക് വേണ്ടി തിരുവനന്തപുരത്ത് പരാതി നല്കിയത് പീഡന കേസിലെ പ്രതിയാണെന്നും ശോഭാ സുരേന്ദ്രന് ആരോപിച്ചു.
മാപ്പ് പറഞ്ഞശേഷവും മാര്ക്സിസ്റ്റ് പാര്ട്ടിയുടെ നേതൃത്വം അദ്ദേഹത്തെ വേട്ടയാടാനാണ് തീരുമാനമെങ്കില് കേരളത്തിലെ അമ്മമാരുടേയും സ്ത്രീകളുടേയും പെണ്കുട്ടികളുടേയും അതിശക്തമായ പിന്തുണ സുരേഷ് ഗോപിക്ക് ഉണ്ടാകും’, ശോഭാ സുരേന്ദ്രന് പറഞ്ഞു.
