ചാലക്കുടി: മുന് സന്തോഷ് ട്രോഫി ഫുട്ബോള് താരത്തെ മരിച്ച നിലയില് കണ്ടെത്തി. ചാലക്കുടി സ്വദേശി ജോണ് പോള് റൊസാരിയോയെയാണ് (59) ആനമല ജങ്ഷനിലെ വീട്ടില് മരിച്ച നിലയില് കണ്ടെത്തിയത്. ഇന്നലെ ഉച്ചയോടെ വീട്ടുകാരാണ് ഇദ്ദേഹത്തെ മുറിയില് മരിച്ച നിലയില് കണ്ടെത്തിയത്. തുടര്ന്ന് ചാലക്കുടി പോലീസില് വിവരം അറിയിക്കുകയായിരുന്നു.
ചാലക്കുടി പോലീസിന്റെ നേതൃത്വത്തില് ഇന്ക്വസ്റ്റ് നടപടികള് പൂര്ത്തിയാക്കി മൃതദേഹം ആശുപത്രി മോര്ച്ചറിയിലേക്ക് മാറ്റി. പോസ്റ്റ്മോര്ട്ടത്തിന് ശേഷമേ മരണകാരണം സംബന്ധിച്ച് വ്യക്തത വരു. കൊച്ചി സെന്ട്രല് എക്സൈസില് സബ് ഇന്സ്പെക്ടര് ആയിരുന്നു റൊസാരിയോ. ഭാര്യ: ജൂലി ഷൈന് റൊസാരിയോ. മകന്: റയാന് എമിലിയോ റോസാരിയോ.
അച്ഛന്: ഇല്ലിക്കല് പരേതനായ സണ്ണി മരിയന് റൊസാരിയോ. അമ്മ: മെബിള് റൊസാരിയോ. സംസ്കാരം ഇന്ന് രാവിലെ 11ന് ചാലക്കുടി ഹോളി ഫാമിലി ലാറ്റിന് പള്ളിയില്.
കേരളത്തിനുവേണ്ടി 1989 സന്തോഷ് ട്രോഫിയില് പങ്കെടുത്ത ജോണ്പോള് റൊസാരിയോ 1985, 1986 വര്ഷങ്ങളില് കാലിക്കറ്റ് യൂണിവേഴ്സിറ്റിക്ക് വേണ്ടി കളിച്ചിരുന്നു. 1987 മുതല് 15 വര്ഷം കൊച്ചിന് കസ്റ്റംസ് ആന്ഡ് സെന്ട്രല് എക്സൈസ് ടീം അംഗമായിരുന്നു.
