അഴീക്കോട്: കോവിഡ് മഹാമാരി സൃഷ്ടിച്ച അടച്ചുപൂട്ടലിനുശേഷം കാവുപറമ്പത്ത് അവര്‍ ഒത്തുകൂടി പച്ചക്കറിക്കൃഷി തുടങ്ങി. അഴീക്കോട്ട് പുതിയാപ്പറമ്പിലെ നാട്ടുകാരുടെ കൂട്ടായ്‌മയാണ് പുതിയകാവ് ഭഗവതി ക്ഷേത്രപ്പറമ്പില്‍ ചേനയും ചേമ്പും വാഴയും പച്ചക്കറികളും നട്ടുനനച്ചത്. ആ പച്ചപ്പില്‍ കൃഷീവലരുടെ മനസ്സില്‍ ഒളിച്ചിരുന്ന സംഗീതവും പാട്ടും അഭിനയവും പുറത്തുചാടി. ക്രമേണ ആ കൃഷിക്കൂട്ടായ്‌മ കാവിലമ്മ കലാക്ഷേത്രയുടെ പിറവിയിലേക്ക് നയിച്ചു. വിജയദശമി സന്ധ്യയില്‍ അഴീക്കോട്ട് പുതിയ കാവിലമ്മയുടെ തിരുമുറ്റത്ത് അത് യാഥാര്‍ഥ്യമായി. അരങ്ങ് തെളിഞ്ഞു.
സ്വാതന്ത്ര്യസമര പോരാട്ട കാലങ്ങളില്‍ നിരവധി നാടകസംഘങ്ങളുടെ അരങ്ങിലാട്ടത്തിന് സാക്ഷ്യം വഹിച്ച അഴീക്കോട് ഗ്രാമത്തില്‍ കാവിലമ്മ കലാക്ഷേത്രയുടെ അരങ്ങ് ദീപം തെളിച്ചത് കോഴിക്കോട് സര്‍വകലാശാലാ സ്‌കൂള്‍ ഓഫ് ഡ്രാമാ മുന്‍ ഡയറക്ടര്‍ ഡോ. എ.കെ. നമ്പ്യാരാണ്. സി.എം.എസ്. ചന്തേര മാഷ് സ്മാരക സംഘവഴക്ക ഗവേഷണ പീഠം ഡയറക്ടര്‍ ഡോ. സഞ്ജീവന്‍ അഴീക്കോട് മുഖ്യഭാഷണം നടത്തി.
പുതിയകാവ് ക്ഷേത്രം ഭരണസമിതി ചെയര്‍മാന്‍ പി. സുരേന്ദ്രന്‍ അധ്യക്ഷത വഹിച്ചു. കാവിലമ്മ കലാക്ഷേത്ര പ്രസിഡന്റ് പ്രഭാകരന്‍ നാമത്ത് സ്വാഗതവും ക്ഷേത്ര ഭരണസമിതി സെക്രട്ടറി കെ. രതീശന്‍ നന്ദിയും പറഞ്ഞു. വിദ്യാരംഭദിനം ചെറുകുന്ന് ആസ്തി കാലയത്തിലെ മനോജ് മാരാരുടെ ചെണ്ട പരിശീലന ക്ലാസ്സും പ്രഭാകരന്‍ നാമത്തിന്റെ യോഗാക്ലാസ്സും കലാക്ഷേത്രയില്‍ ആരംഭിക്കുകയും ചെയ്തു. പടനായകന്മാരുടെയും നിരവധി കളരി അഭ്യാസികളുടെയും നാടായ അഴീക്കോടിന്റെ നാടക പാരമ്പര്യത്തെ പുതിയ തലമുറ പുതിയ കാവില്‍ പുനരുജ്ജീവിപ്പിച്ചത് കളരിവിദ്യയുടെ പശ്ചാത്തലമുള്ള നാടകം അരങ്ങിലെത്തിച്ചിട്ടാണെന്നതുംശ്രദ്ധേയം.ആയോധനക്കളരിയും കളരി ചികിത്സയും നടത്തിവരുന്ന ഗ്രാമത്തിലെ പുരാതന തറവാട് റിയല്‍ എസ്‌റേറ്റ് -ഫ്‌ലാറ്റ് മാഫിയ തട്ടിയെടുക്കാന്‍ നോക്കുന്നതും ആ മാഫിയ ശക്തിയെ ചെറുത്ത് തോല്പിച്ച ശിഷ്യര്‍ കളരിയെ സംരക്ഷിച്ച് ഗുരുദക്ഷിണ സമര്‍പ്പിക്കുന്നതുമാണ് നാടകത്തിന്റെ ഇതിവൃത്തം.
പ്രശസ്ത സാഹിത്യകാരന്‍ ടി.കെ.ഡി. മുഴപ്പിലങ്ങാടാണ് ഗുരുദക്ഷിണ നാടകമെഴുതിയത്. കരാട്ടെയും കളരിയും പഠിച്ച പ്രഭാകരന്‍ നാമത്താണ് നാടകത്തിന്റെ സംവിധാനം അഗസ്ത്യ കളരി ഗുരുക്കള്‍ പ്രശാന്ത് പുളീക്കണ്ടിയും ശിഷ്യരുമാണ് നാടകത്തില്‍ കളരി അഭ്യാസമുറകള്‍ തന്മയത്വത്തോടെ അവതരിപ്പിച്ചത്. മോഹന്‍ കുറുവ സംഗീതവും ധനരാജ് മാണിയാട്ട് രംഗപടവും മുരളി കുളപ്പുള്ളി ഗാന രചനയും ഭാസി വര്‍ണാലയം ചമയവും ശിവതീര്‍ഥ വസ്ത്രാലങ്കാരവും അനിത ചാല ശബ്ദവും പി. രാജീവന്‍ വെളിച്ചവും നിയന്ത്രിച്ചു. പ്രഭാകരന്‍ നാമത്ത്, കൃഷ്ണകുമാര്‍, മനോജ് കാനാറത്ത്, പി.ടി. അതുല്‍, പ്രശാന്ത് അഗസ്ത്യ, അഞ്ജന അശോക്, മാളവിക, പി.ടി. ഭരതന്‍, ശ്രീജിത്ത് പാറക്കാട്ട്, പ്രണവ് കൊട്ടാരത്തും പാറ, ഷിനാജ്, പി. അഭിജിത്, സച്ചിദാനന്ദന്‍, മുകേഷ് എന്നിവരാണ് കഥാപാത്രങ്ങളെ പകര്‍ന്നാടി അരങ്ങിലെത്തിച്ചത്.
കളരി വിദ്യാര്‍ത്ഥികളായി അക്ഷര അനില്‍കുമാര്‍, ശ്രേയ നിഷാന്ത് പൊയില്‍, ആദിഷ് പ്രതാപ്, ഋതുല്‍ റിജേഷ്, ഋഷഭ് റിജേഷ്, കാര്‍ത്തിക് സാജന്‍, സജയ് മനോജ്, സൗരി കൃഷ്ണ പി, സൂര്യനന്ദ് പൊയില്‍ എന്നീ ഒമ്പത് സ്‌കൂള്‍ കുട്ടികളും കാവിലമ്മ കലാക്ഷേത്രയുടെ ആദ്യനാടകമായ ഗുരുദക്ഷിണയില്‍ കഥാപാത്രങ്ങളായി. തിരുമുറ്റം തിങ്ങി നിറഞ്ഞ സഹൃദയ സദസ്സ് ഹര്‍ഷാരവത്തോടെയാണ് കാവിലമ്മ കലാക്ഷേത്രയുടെ ആദ്യ നാടകത്തെ വരവേറ്റത്.
