കൊട്ടിയം: അംഗപരിമിതയായ വയോധികയോട് ലൈംഗികാതിക്രമം നടത്തിയ യുവാവ് അറസ്റ്റില്‍. ഓയൂര്‍, മീയന, റാഷിന മന്‍സിലില്‍ റാഷിദിനെ (33) ആണ് കൊട്ടിയം പോലീസ് അറസ്റ്റ് ചെയ്‌യത്.
തെളിവെടുപ്പിനായി പ്രതിയെ പോലീസ് സംഭവ സ്ഥലത്തെത്തിച്ചപ്പോള്‍ നാട്ടുകാര്‍ പ്രതിഷേധവുമായി രംഗത്തെത്തിയത് സംഘര്‍ഷാവസ്ഥയ്‌ക്ക് കാരണമായി. ചാത്തന്നൂര്‍ എസിപി ഗോപകുമാറിന്റെ നേതൃത്വത്തില്‍ വന്‍ പോലീസ് സംഘം സ്ഥലത്തെത്തിയാണ് തെളിവെടുപ്പ് നടത്തിയ ശേഷം പ്രതിയെ തിരികെ കൊണ്ടുപോയത്. കഴിഞ്ഞ വെള്ളിയാഴ്ചയാണ് കേസിന് ആസ്പദമായ സംഭവം. കൊട്ടിയം ജങ്ഷനില്‍ കടത്തിണ്ണയില്‍ കിടക്കുകയായിരുന്ന വയോധികയെയാണ് പ്രതി അക്രമിച്ചത്. പ്രതിരോധിച്ച വയോധികയെ ഇയാള്‍ ക്രൂരമായി മര്‍ദ്ദിച്ചു. തുടര്‍ന്ന് കടത്തിക്കൊണ്ടുപോകാന്‍ ശ്രമിക്കുകയും
ചെയ്തു.
ഇവര്‍ ബഹളം വച്ചതിനെ തുടര്‍ന്ന് ഉപേക്ഷിച്ചു കടന്നുകളയുകയായിരുന്നു. സിത്താര ജങ്ഷന് സമീപം ചോരയെലിപ്പിച്ച് കിടക്കുന്ന വയോധികയെ നാട്ടുകാരാണ് കണ്ടെത്തിയത്. മര്‍ദനത്തില്‍ സാരമായി പരിക്കേറ്റ ഇവരെ മകളെത്തി കൊട്ടിയത്തുള്ള സ്വകാര്യ ആശുപത്രിയില്‍ പ്രവേശിപ്പിക്കുകയായിരുന്നു. പിന്നീട് മകള്‍ നല്കിയ പരാതിയുടെ അടിസ്ഥാനത്തില്‍ കേസ് രജിസറ്റര്‍ ചെയ്ത് നടത്തിയ അന്വേഷണത്തിലാണ് പ്രതിയെ പിടികൂടിയത്. കൊട്ടിയം പോലീസ് ഇന്‍സ്പെക്ടര്‍ വിനോദിന്റെ നേതൃത്വത്തില്‍ എസ്ഐമാരായ നിതിന്‍ നളന്‍, റെനോക്സ്, എസ്സിപിഒ സജു, സീനു, ഷെമീര്‍ എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്.
