പാലക്കാട്: ആര്‍എസ്എസും സേവാഭാരതിയും സംയുക്തമായി 5 സ്വയംസേവകര്‍ക്ക് വീട് നിര്‍മിച്ചു നല്‍കുന്നതിന്റെ തറക്കല്ലിടല്‍ ചടങ്ങ് ആര്‍എസ്എസ് പ്രാന്തസഹകാര്യവാഹ് കെ.പി. രാധാകൃഷ്ണന്‍ നിര്‍വഹിച്ചു. റിട്ട. അധ്യാപകന്‍ വേലായുധന്‍ അധ്യക്ഷത വഹിച്ചു.
എലപ്പുള്ളി പേട്ട സിഎച്ച്സിക്ക് സമീപം മുതിര്‍ന്ന സ്വയംസേവകനും വ്യാസവിദ്യാപീഠം മുന്‍ പ്രസിഡന്റുമായ കിഷോര്‍ ഭാര്‍ഗവ സൗജന്യമായി നല്‍കിയ 25 സെന്റ് സ്ഥലത്താണ് എലപ്പുള്ളി സ്വദേശികളായ രമേഷ്, ആറുമുഖന്‍, കല്ലേപ്പുള്ളി സ്വദേശി ശരണവന്‍, എരട്ടക്കുളം സ്വദേശി വിഷ്ണു, ചെറക്കാട് സ്വദേശി രാജീവ് എന്നിവര്‍ക്ക് വീട് നിര്‍മിച്ചു നല്‍കുന്നത്.
ആറു മാസത്തിനകം വീടുകളുടെ നിര്‍മാണം പൂര്‍ത്തിയാക്കും. അതോടൊപ്പം സേവാഭാരതിയുടെ കീഴില്‍ സ്ത്രീ ശാക്തീകരണം ലക്ഷ്യംവെച്ച് സേവാകേന്ദ്രവും പ്രവര്‍ത്തനമാരംഭിക്കും. വിഭാഗ് സംഘചാലക് വി.കെ. സോമസുന്ദരന്‍, ജില്ലാ സഹസംഘചാലക് കെ.പി. രാജേന്ദ്രന്‍, ഖണ്ഡ് സഹസംഘചാലക് ശശികുമാര്‍, വിഭാഗ് പ്രചാരക് എ. ഗോപാലകൃഷ്ണന്‍, സഹകാര്യവാഹ് കെ. സുധീര്‍, ബിഎംഎസ് ജില്ലാ ജോ. സെക്രട്ടറി ശിവദാസ്, ബിജെപി മണ്ഡലം പ്രസിഡന്റ് സി.ബി. പ്രമോദ് പങ്കെടുത്തു.
