പത്തനംതിട്ട: സന്നിധാനത്ത് ദർശനം നടത്തി നിയുക്ത ശബരിമല, മാളികപ്പുറം മേൽശാന്തിമാർ. നിയുക്ത ശബരിമല മേൽശാന്തി മൂവാറ്റുപുഴ ഏനാനല്ലൂർ സ്വദേശി പിഎൻ മഹേഷും മാളികപ്പുറം മേൽശാന്തി തൃശൂർ സ്വദേശിയായ തൊഴിയൂർ വടക്കേക്കോട്ട് പൂങ്ങാട്ട്മന പിജി മുരളിയുമാണ് സന്നിധാനത്ത് ദർശനം നടത്തിയത്. ഇന്നലെ രാത്രിയായിരുന്നു പിഎൻ മഹേഷ് ശബരിമലയിൽ എത്തിയത്.
ഇന്നലെ രാവിലെ എട്ട് മണിയോടെയാണ് ഹൈദരാബാദ് രാജ്ഭവൻ റോഡ് സോമാജിഗുഡ അയ്യപ്പ ക്ഷേത്രത്തിലെ പൂജാരിയായ പിജി മുരളി സന്നിധാനത്ത് എത്തുന്നത്. തുടർന്ന് ഇരുവരും ഒന്നിച്ച് ഇന്നലെ രാത്രിയോടെ ദർശനം നടത്തി. ഉഷപൂജയും കലശപൂജയും തൊഴുതതിന് ശേഷം മാളികപ്പുറം ക്ഷേത്രത്തിലും ദർശനം നടത്തി.
നവംബർ 16-ന് വൈകിട്ട് അഞ്ച് മണിയോടെ ഇരുവരും കെട്ടുനിറച്ച് സന്നിധാനത്ത് എത്തും. അന്ന് വൈകിട്ടാണ് ഇരുവരും മേൽശാന്തിമാരായി ചുമതല ഏൽക്കുന്നത്.
