തൊടുപുഴ: കൈയേറ്റം ഒഴിപ്പിക്കല് നിര്ത്തുമെന്നും ഇതുസംബന്ധിച്ച് ജില്ലാ കളക്ടറുടെ ഉറപ്പു ലഭിച്ചെന്നും സിപിഎം ജില്ലാ സെക്രട്ടറി സി.വി. വര്ഗീസ് പറയുന്നു.
എന്നാല് നടപടി നിര്ത്തില്ലെന്നും ദൗത്യം തുടരുമെന്നും കളക്ടര് ഷീബ ജോര്ജും വ്യക്തമാക്കി. ചിന്നക്കനാലിലെ കുടിയേറ്റമൊഴിപ്പിക്കല് കോടതി നിര്ദേശ പ്രകാരമുള്ള ഒറ്റപ്പെട്ട സംഭവമായിട്ടാണ് കണക്കാക്കുന്നതെന്നായിരുന്നു സി.വി. വര്ഗീസിന്റെ പ്രതികരണം.
കൂടിയാലോചനകള്ക്ക് ശേഷം മാത്രമേ നടപടികള് സ്വീകരിക്കാവു എന്നതാണ് പാര്ട്ടി നിലപാട്. ഇത് ജില്ലാ കളക്ടറെ ബോധിപ്പിച്ചിട്ടുണ്ട്. ചിന്നക്കനാലില് മറ്റൊരിടത്തും നടപടികളിലേക്ക് കടക്കില്ലെന്ന് ജില്ലാ കളക്ടര് ഉറപ്പ് നല്കിയതായും കൈയേറ്റം ഒഴിപ്പിക്കല് നിര്ത്തുമെന്നും വര്ഗീസ് പറഞ്ഞു.
ജില്ലാ ഭരണകൂടത്തെ നിയന്ത്രിക്കുന്നത് സിപിഎം ആണെന്ന ആക്ഷേപമുയര്ന്നതോടെ ഇക്കാര്യത്തില് ഇടുക്കി ജില്ലാ കളക്ടര് പ്രതികരിച്ചു. ദൗത്യം നിര്ത്തും എന്ന് ഉറപ്പ് നല്കിയിട്ടില്ലെന്നും നടപടികളുമായി മുന്നോട്ടു പോകുമെന്നും ഷീബ ജോര്ജ് പറഞ്ഞു.
