തിരുവനന്തപുരം: വിഴിഞ്ഞത്ത് മുഖ്യമന്ത്രി പിണറായി വിജയനും കൂട്ടര്‍ക്കും ക്രെയിനുമായി വന്ന കപ്പലിന് വാട്ടര്‍ സല്യൂട്ട് നല്കി സ്വീകരിക്കേണ്ടി വന്ന അവസ്ഥ അപഹാസ്യമെന്ന് കേന്ദ്രമന്ത്രി വി. മുരളീധരന്‍. അസാധ്യമായത് സാധ്യമാക്കി എന്ന് വീമ്പ് പറഞ്ഞ മുഖ്യമന്ത്രി ഓര്‍ക്കണം, നാലു വര്‍ഷം മുന്‍പ് നടക്കേണ്ട ഒരു ചടങ്ങാണ് ഇന്നലെ നടന്നതെന്ന്. മൂന്നാംഘട്ടം ഈ വര്‍ഷം പൂര്‍ത്തിയാകേണ്ട പദ്ധതി അനന്തമായി വൈകിപ്പിച്ച ശേഷം ഒന്നാംഘട്ടം ആഘോഷിക്കാന്‍ അസാധ്യ തൊലിക്കട്ടി വേണമെന്നും അദ്ദേഹം മാധ്യമങ്ങളോട് പറഞ്ഞു.
കടല്‍ക്കൊള്ള എന്ന് ആരോപണമുയര്‍ത്തിയവര്‍ ഇന്ന് അദാനിയെ വാഴ്‌ത്തുകയാണ്. നാട് മുഴുവന്‍ അദാനിയുടെ പണമുപയോഗിച്ച് ഫഌക്‌സ് വച്ചാണ് ആഘോഷം. അദാനി കേരളത്തില്‍ പണമിറക്കിയാല്‍ നല്ല അദാനി അല്ലെങ്കില്‍ ഫാസിസ്റ്റ് ഭീകരന്‍ എന്നതാണ് സിപിഎം നയം. കരാര്‍ ഒപ്പിട്ടതിന്റെ അടുത്ത ദിവസം കടല്‍ക്കൊള്ള എന്ന് എട്ട് കോളം തലക്കെട്ടോടു കൂടിയാണ് പാര്‍ട്ടി പത്രത്തില്‍ വാര്‍ത്ത കൊടുത്തത്. ഇപ്പോള്‍ അതേ കടല്‍ക്കൊള്ളക്കാരന്റെ പടമുള്ള ഫഌക്‌സ് വച്ച് ആഘോഷം നടത്തുന്നു. ആര് വികസനം കൊണ്ടുവന്നാലും അതിനെ തുറന്നമനസോടെ സ്വീകരിക്കാനാകണം. അല്ലെങ്കില്‍ ഇരട്ടത്താപ്പ് അവസാനിപ്പിക്കണമെന്നും കേന്ദ്രമന്ത്രി ആവശ്യപ്പെട്ടു.
നരേന്ദ്ര മോദി സര്‍ക്കാര്‍ നടത്തിയ ഇടപെടലുകള്‍ കൊണ്ട് വേഗതയുണ്ടായ പദ്ധതിയാണ് വിഴിഞ്ഞം തുറമുഖം. 2005 മുതല്‍ 2015 വരെ കേന്ദ്രവും കേരളവും ഭരിച്ചത് ഇടതുവലതു മുന്നണികളാണ്. അന്ന് തമിഴ്‌നാടിന് വേണ്ടി ആഭ്യന്തരമന്ത്രി ചിദംബരം നടത്തിയ ചരടുവലികള്‍ പദ്ധതിക്ക് കുരുക്കായി. ജനങ്ങളുടെ ഓര്‍മയെ പരീക്ഷിക്കരുതെന്നും മന്ത്രി പറഞ്ഞു.
വിഴിഞ്ഞത്ത് ചില സമുദായത്തിന്റെ പേര് മാത്രം പറഞ്ഞ് സിപിഎമ്മും കോണ്‍ഗ്രസും മുതലെടുപ്പ് നടത്തി. ഒരു വിഭാഗത്തെ മാത്രം പ്രീണിപ്പിക്കാനുള്ള ശ്രമമാണ് ഇപ്പോള്‍ നടക്കുന്നത്. വിഴിഞ്ഞത്തിന് വേണ്ടി സ്വന്തം വീടും സ്ഥലവും ജീവനോപാധികളും നല്കിയവരാണ് മുല്ലൂര്‍ നിവാസികള്‍.
അവര്‍ക്കെതിരെ പോലീസിന്റെ സംരക്ഷണത്തോടു കൂടി ഏകപക്ഷീയമായ ആക്രമണങ്ങള്‍ സമരത്തിന്റെ പേരില്‍ നടത്തിയില്ലേ. സ്ഥലം എംഎല്‍എ പോലും സെലക്ടീവായി ആണ് പെരുമാറിയത്. ഇരുപതോളം വീടുകളും അമ്പതോളം ആള്‍ക്കാരെയും ആക്രമിച്ചിട്ട് സ്ഥലം എംഎല്‍എ ആ സ്ഥലം ഇതുവരെയും സന്ദര്‍ശിച്ചിട്ടില്ല. എംഎല്‍എ ഏതെങ്കിലും ഒരു സമുദായത്തിന്റെ മാത്രം അല്ലെന്നും മുരളീധരന്‍ പറഞ്ഞു.
പദ്ധതി വേഗത്തിലാക്കാന്‍ ഇനിയെങ്കിലും ശ്രമമുണ്ടാകണം. കൊവിഡും പ്രളയവും പറയുന്നവര്‍, കൊവിഡ് കാലത്ത് ഉയര്‍ന്ന പാര്‍ലമെന്റ് മന്ദിരത്തിലേക്ക് നോക്കണം. പ്രളയം കാരണമായി പറയുന്നവര്‍ ആദ്യം വെള്ളക്കെട്ടിന് സമാധാനമുണ്ടാക്കട്ടെ എന്നും അദ്ദേഹം പറഞ്ഞു.
