ഹമാസ് അനുകൂലികളെ കേരളത്തില്‍ ഇളക്കി വിടുന്നത് സിപിഎമ്മും കോണ്‍ഗ്രസും ലീഗും; പിന്നില്‍ മത ദേശീയ വിരുദ്ധത: കെ സുരേന്ദ്രന്‍

തിരുവനന്തപുരം: കേരളത്തില്‍ ഹമാസ് അനുകൂലികളെ ഇളക്കി വിടുന്നത് സിപിഎമ്മും കോണ്‍ഗ്രസും ലീഗുമാണെന്ന് ബിജെപി സംസ്ഥാന അദ്ധ്യക്ഷന്‍ കെ. സുരേന്ദ്രന്‍ പറഞ്ഞു. സമൂഹമാധ്യമത്തില്‍ പങ്കുവെച്ച പോസ്റ്റിലാണ് അദ്ദേഹം ഇത് പറഞ്ഞത്.

ഈ പ്രവണത ഇസ്രായേലിനോടുള്ള വിരോധം കാരണമെന്നു കരുതാനാവില്ല. ഇന്ത്യാ വിരോധമാണ് നുരഞ്ഞു പൊന്തുന്നത്. ഇതിനൊപ്പം ഹിന്ദുക്കളോടും കൃസ്ത്യാനികളോടുമുള്ള തീരാ പകയുമാണ് കാണാന്‍ സാധിക്കുന്നതെന്നും അദേഹം വ്യക്തമാക്കി.

ഇസ്രായേലിന് നേരെ പാലസ്തീന്‍ ഭീകര സംഘടനയായ ഹമാസ് നടത്തിയ ആക്രമണത്തില്‍ ഇതുവരെ 700ലേറെ പേരാണ് മരിച്ചത്. ഇതിനെ ഭാരതം അപലപ്പിക്കുകയും ഇസ്രായേലിന് പിന്തുണ പ്രഖ്യാപിക്കുകയും ചെയ്തു.

എന്നാല്‍ കോണ്‍ഗ്രസും സിപിഎമ്മും പാലസ്തീന് അനുകൂല നിലപാടാണ് കൈക്കൊണ്ടത്. ഭാരതത്തിന്റെ ശക്തമായ നിലപാടിനു പിന്നാലെ അമേരിക്കയും ബ്രിട്ടണുമടക്കമുള്ള നിരവധി രാജ്യങ്ങള്‍ ഇസ്രായേലിനെ പിന്തുണച്ച് മുന്നോട്ട് വന്നിയിരുന്നു.