കോട്ടയം: എംഡിഎംഎ മലദ്വാരത്തില്‍ ഒളിപ്പിച്ച് കടത്താന്‍ ശ്രമിച്ച രണ്ടു യുവാക്കളെ പിടികൂടി പോലീസ്. 32 ഗ്രാം എംഡിഎംഎയുമായി എത്തിയ രണ്ടുപേരാണ് കോട്ടയം വൈക്കത്ത് വച്ച് അറസ്റ്റിലായത്. ഏറെ നാളായുള്ള നിരീക്ഷണത്തിനു ശേഷമാണ് പോലീസിന്റെ നടപടി.
ഈരാറ്റുപേട്ട പത്താഴപ്പടി സ്വദേശി മുഹമ്മദ് മുനീര്‍(25), തലനാട് സ്വദേശി അക്ഷയ് സോണി(25) എന്നിവരെയാണ് പോലീസ് പിടികൂടിയത്. കോട്ടയം എസ്പി കെ കാര്‍ത്തിക്കിന്റെ നേതൃത്വത്തിലുളള പോലീസ് സംഘമാണ് ഇരുവരെയും അറസ്റ്റ് ചെയ്തത്. പ്രാഥമിക പരിശോധനയില്‍ ഇരുവരില്‍ നിന്നും ലഹരി ഉല്‍പന്നങ്ങളൊന്നും കിട്ടിയില്ല.
എന്നാല്‍ പിന്നീട് നടന്ന വിശദമായ ശരീര പരിശോധനയിലാണ് മലദ്വാരത്തില്‍ ഒളിപ്പിച്ച നിലയില്‍ 32.1 ഗ്രാം എംഡിഎംഎ ഇരുവരില്‍ നിന്നുമായി കണ്ടെടുത്തത്. അറസ്റ്റിലായ അക്ഷയ് സോണി എറണാകുളത്ത് കഞ്ചാവ് കേസിലും കുമരകത്ത് മുക്കുപണ്ട തട്ടിപ്പ് കേസിലും പ്രതിയാണ്. മുനീറിനെതിരെ ഈരാറ്റുപേട്ടയില്‍ എക്‌സൈസും പോലീസും കഞ്ചാവ് കച്ചവടത്തില്‍ കേസെടുത്തിട്ടുണ്ട്.
