കോഴിക്കോട്: കരുവന്നൂര് ഉള്പ്പെടെ കേരളത്തില് നടന്ന സഹകരണ മെഗാ കുംഭകോണത്തില് ഇ ഡി അന്വേഷണത്തെ അട്ടിമറിക്കാനാണ് മുഖ്യമന്ത്രിയും സിപിഎം സംസ്ഥാന സെക്രട്ടറി എം.വി. ഗോവിന്ദനും ശ്രമിക്കുന്നതെന്ന് ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസ്. കോഴിക്കോട് മാരാര്ജി ഭവനില് വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
സഹകരണ തട്ടിപ്പില് സിപിഎം ബ്രാഞ്ച് സെക്രട്ടറി മുതല് സംസ്ഥാന നേതൃത്വത്തിനു
വരെ പങ്കുണ്ട്. ക്രൈം ബ്രാഞ്ച്, സഹകരണ വകുപ്പന്വേഷണങ്ങളിലൂടെ തട്ടിപ്പുകാരെ സംരക്ഷിക്കാനാണ് സിപിഎമ്മും സര്ക്കാരും ശ്രമിക്കുന്നത്.
സംസ്ഥാനത്താകമാനം അയ്യായിരം കോടിയുടെ സഹകരണ മെഗാ കുംഭകോണമാണ് നടന്നിരിക്കുന്നത്. ഇത്രയും വലിയ തട്ടിപ്പിനെയാണ് ഒറ്റപ്പെട്ട സംഭവമായും ഒറ്റ കറുത്ത വറ്റായും മുഖ്യമന്ത്രി വിശേഷിപ്പിക്കുന്നത്. വറ്റ് മാത്രമല്ല കലം മുഴുവന് കറുത്തിരിക്കുകയാണെന്ന് പി.കെ. കൃഷ്ണദാസ് വിമര്ശിച്ചു.
മന്ത്രി വി.എന്. വാസവന് 2022ല് നിയമസഭയില് വെളിപ്പെടുത്തിയത് 399 സഹകരണ സംഘങ്ങളില് തട്ടിപ്പ് നടന്നുവെന്നാണ്. ഇപ്പോളത് അറുന്നൂറിലധികമായിരിക്കുന്നു. കട്ടവരോട് ഐക്യദാര്ഢ്യം പ്രഖ്യാപിക്കുന്ന മുഖ്യമന്ത്രി കേരളത്തിന് നാണക്കേടാണ്.
സഹകരണ ബാങ്കുകളില് തീവ്രവാദ സംഘടനകളുടെ അടക്കം പണമാണ് സിപിഎം നേതാക്കള് നിക്ഷേപിച്ചിരിക്കുന്നത്. കള്ളപ്പണം വെളുപ്പിക്കാന് സഹകരണ ബാങ്കുകളെ ഉപയോഗിക്കുകയാണ്. 2016 നവംബറിന് ശേഷവും മുന്പും
ഉണ്ടായിരുന്ന സഹകരണ ബാങ്കുകളിലെ നിക്ഷേപം വെളിപ്പെടുത്താന് മുഖ്യമന്ത്രിയും വകുപ്പു മന്ത്രിയും തയാറാകണമെന്നും അദ്ദേഹം പറഞ്ഞു.
മെഗാ കുംഭകോണത്തിനെതിരെ ബിജെപി നിയമപരമായും രാഷ്ട്രീയമായും പോരാടും. ഒക്ടോബര് രണ്ടിന് കരുവന്നൂരില് നിന്ന് തൃശ്ശൂര് സഹകരണ ബാങ്കിലേക്ക് സുരേഷ്ഗോപിയുടെ നേതൃത്വത്തില് പ്രക്ഷോഭയാത്ര സംഘടിപ്പിക്കും. സംസ്ഥാന വ്യാപകമായി സഹകരണ അദാലത്ത് നടത്തി കുംഭകോണം പൂര്ണമായും പുറത്ത് കൊണ്ടുവരും.
നിക്ഷേപകര്ക്ക് നിയമസഹായം സൗജന്യമായി നല്കും. കേരള കോ-ഓപ്പറേറ്റീവ് ഡെപ്പോസിറ്റ് ഗ്യാരണ്ടി ഫണ്ട് ബോര്ഡിലൂടെ നിക്ഷേപകര്ക്ക് നഷ്ടമായ പണം തിരികെ നല്കാന് സംസ്ഥാന സര്ക്കാര് തയാറാകണമെന്നും അദ്ദേഹം ആവശ്യപ്പെട്ടു. ബിജെപി ജില്ലാ പ്രസിഡന്റ് അഡ്വ. വി.കെ. സജീവന്, വൈസ് പ്രസിഡന്റ് ഹരിദാസ് പൊക്കിണാരി എന്നിവര് പങ്കെടുത്തു.
