തിരുവനന്തപുരം: സത്യജിത് റായ് ഫിലിം ഇന്സ്റ്റിറ്റിയൂട്ട് അധ്യക്ഷ സ്ഥാനം നടനും ബിജെപി നേതാവുമായ സുരേഷ് ഗോപി ഏറ്റെടുത്തേക്കില്ലെന്ന് സൂചന എന്ന തരത്തില് ചില മാധ്യമങ്ങളില് വന്ന വാര്ത്തയില് രൂക്ഷ വിമര്ശനവുമായി ബിജെപി സംസ്ഥാന അധ്യക്ഷന് കെ സുരേന്ദ്രന്.
സുരേഷ്ഗോപിയെ വടക്കുംനാഥന്റെ തട്ടകം ഏറ്റെടുത്തുകഴിഞ്ഞുവെന്നും ആരുവിചാരിച്ചാലും ഇനി അത് തടയാനാവില്ലെന്നും അദ്ദേഹം ഫേസ്ബുക്ക് പോസ്റ്റിലൂടെ വ്യക്തമാക്കി.
സുരേഷ് ഗോപിയുടെ പേരും പറഞ്ഞ് രാവിലെ മുതല് മലയാളം ചാനലുകള് എന്തെല്ലാം വൃത്തികേടുകളാണ് പറഞ്ഞുകൊണ്ടിരിക്കുന്നത്. തുടങ്ങിയത് പതിവുപോലെ ‘അതേ’ചാനല്. പിന്നില് കോണ്ഗ്രസ് അജണ്ടയാണെന്നും തൃശ്ശൂരില് പ്രതാപന്റെ വിജയം ഉറപ്പുവരുത്താന് ഏതറ്റംവരെയും ഇവര് പോകുമെന്നും സുരേന്ദ്രന് പറഞ്ഞു.
ഫേസ്ബുക്ക് പോസ്റ്റ്:
”ബഹുമാന്യനായ സുരേഷ് ഗോപിയുടെ പേരും പറഞ്ഞ് രാവിലെ മുതല് മലയാളം ചാനലുകള് എന്തെല്ലാം വൃത്തികേടുകളാണ് പറഞ്ഞുകൊണ്ടിരിക്കുന്നത്. തുടങ്ങിയത് പതിവുപോലെ ‘അതേ’ചാനല്. പിന്നെ കാക്കക്കൂട്ടം പോലെഎല്ലാവരും ചേര്ന്ന് ആക്രമണം. ഒരു വാര്ത്ത കൊടുക്കുന്നതിനുമുന്പ് വസ്തുത എന്തെന്നെങ്കിലും പരിശോധിക്കാനുള്ള ബാധ്യതയില്ലേ ഇത്തരക്കാര്ക്ക്. ഇത് കോണ്ഗ്രസ്സ് അജണ്ടയാണ്. പാലാക്കാരനായ ഒരു കോണ്ഗ്രസ്സുകാരനാണ് ആദ്യം ഇത് സാമൂഹ്യമാധ്യമത്തില് പോസ്റ്റിടുന്നത്. ‘അതേ’ചാനലിലെ കോണ്ഗ്രസ്സ് ഏജന്റായ റിപ്പോര്ട്ടറാണ് ആദ്യം ഇത് ബ്രേക്ക് ചെയ്യുന്നത്. തൃശ്ശൂരില് പ്രതാപന്റെ വിജയം ഉറപ്പുവരുത്താന് ഈ സംഘം ഏതറ്റംവരെയും പോകുമെന്ന് അറിയാത്തവരല്ല ഞങ്ങള്. ഇനിയും ഇത്തരം വാര്ത്തകള് വന്നുകൊണ്ടേയിരിക്കും . അരദിവസത്തെ ആയുസ്സുപോലും ഇല്ലാത്ത കള്ളക്കഥകള്. സുരേഷ് ഗോപിയെ വടക്കുന്നാഥന്റെ തട്ടകം ഏറ്റെടുത്തുകഴിഞ്ഞു. ആരുവിചാരിച്ചാലും ഇനി അത് തടയാനാവില്ല.
