ദുബായ്: ഏഷ്യാകപ്പ് ഫൈനലിലെ തകര്‍പ്പന്‍ പ്രകടനത്തിന് പിന്നാലെ ഏകദിന ബോളിങ്ങ് റാങ്കിങ്ങില്‍ ഭാരതത്തിന്റെ മുഹമ്മദ് സിറാജ് ഒന്നാം സ്ഥാനത്തേക്ക് തിരിച്ചെത്തി. കഴിഞ്ഞ ജനുവരിയിലാണ് താരം ആദ്യമായി ഐസിസി ഏകദിന റാങ്കിങ്ങില്‍ മുന്നിലെത്തിയത്. അധികം ആയുസുണ്ടായില്ല. മാര്‍ച്ച് ആയപ്പോഴേക്കും സിറാജിനെ മറികടന്ന് ഓസ്‌ട്രേലിയന്‍ ബോളര്‍ ജോഷ് ഹെയ്‌സല്‍വുഡ് ഒന്നാം റാങ്കിലെത്തി.
ഏഷ്യാകപ്പ് ഫൈനലിലെ തകര്‍പ്പന്‍ പ്രകടനമാണ് സിറാജിനെ വീണ്ടും ഒന്നാമനാക്കിയത്. ഞായറാഴ്ച നടന്ന ഫൈനലില്‍ ആറ് വിക്കറ്റ് നേടി കരിയറിലെ ഏറ്റവും മികച്ച പ്രകടനത്തോടെ ഫൈനലിന്റെ താരമായാണ് സിറാജ് മടങ്ങിയത്. ലങ്കയെ വളരെ കുറഞ്ഞ സ്‌കോറിന് പുറത്താക്കുന്നതില്‍ നിര്‍ണായക പങ്കുവഹിച്ച സിറാജ് ഒരോവറില്‍ നാല് വിക്കറ്റ് നേടുന്ന ആദ്യ ഭാരതീയന്‍ എന്ന നേട്ടം കൂടി സ്വന്തമാക്കി.
