ഇരിങ്ങാലക്കുട: കരുവന്നൂര് ബാങ്കിലെ ക്രമക്കേടുകള് ആദ്യം വെളിച്ചത്തു കൊണ്ടുവന്ന വ്യക്തിക്കു ജീവന് ഭീഷണി ഉണ്ടെന്ന് പോലീസ് രഹസ്യാന്വേഷണ വിഭാഗം റിപ്പോര്ട്ട്. ബാങ്ക് ജീവനക്കാരനായിരുന്ന പൊറത്തിശേരി മുപ്പുള്ളി വീട്ടില് എം.വി. സുരേഷിനാണു ഭീഷണിയുള്ളത്. സ്പെഷല് ബ്രാഞ്ച് കഴിഞ്ഞ ദിവസം റിപ്പേര്ട്ട് നല്കിയതിന്റെ അടിസ്ഥാനത്തില് സുരേഷിന്റെ പൊറത്തിശേരിയിലെ വീടിനു മുന്നില് പോലീസിന്റെ പഞ്ചിങ് ഏര്പ്പെടുത്തി.
2005 ല് ബാങ്കിന്റെ സിവില് സ്റ്റേഷന് എക്സ്റ്റന്ഷന് കൗണ്ടറിന്റെ മാനേജരും സിപിഎം ലോക്കല് കമ്മിറ്റി അംഗവുമായിരുന്ന എം.വി. സുരേഷാണ് സിപിഎം ജില്ലാ സെക്രട്ടറി ബേബി ജോണിനു ബാങ്കിലെ ക്രമക്കേടു സംബന്ധിച്ച് ആദ്യമായി പരാതി നല്കുന്നത്. ബാങ്കില് നടക്കുന്ന ക്രമക്കേടുകള് നിയന്ത്രിക്കണമെന്നായിരുന്നു പരാതിയിലുണ്ടായിരുന്നത്.
കമ്മിഷനെ നിയോഗിച്ച് അന്വേഷണം നടത്തിയിരുന്നുവെങ്കിലും പിന്നീട് എ.സി. മൊയ്തീന് ജില്ലാ സെക്രട്ടറിയായി ചുമതലയേറ്റതോടെ അന്വേഷണം നിലച്ചു.
2015 ല് പൊറത്തിശേരിചിറ മണപ്പെട്ടി ബാലന് എന്ന വ്യക്തിയുടെ 67,500 രൂപയുടെ നിക്ഷേപത്തില് നിന്നും സെക്രട്ടറിയും വനിതാ ജീവനക്കാരിയും ചേര്ന്ന് ലോണെടുത്ത് ഇരുവരും പങ്കുവച്ച സംഭവം പരാതിപ്പെട്ടതോടെ സുരേഷിനെതിരെ വനിതാ ജീവനക്കാരിയില് നിന്നും പരാതി എഴുതി വാങ്ങുകയായിരുന്നു ബാങ്ക് അധികൃതര്. ഈ പരാതിയുടെ അടിസ്ഥാനത്തില് 2015 നവം. 11 ന് ബാങ്കില് നിന്നും സസ്പെന്ഡ് ചെയ്യപ്പെട്ടതോടെ 2016 ല് സുരേഷ് സിപിഎം വിട്ട് ബിജെപിയില് ചേര്ന്നു. 2018 ആഗസ്ത് 20 ന് ജോലിയില് നിന്നും പിരിച്ചുവിട്ടതോടെ 2019 ജനു. 16 ന് ജോയിന്റ് രജിസ്ട്രാര്ക്ക് ക്രമക്കേടുകള് സംബന്ധിച്ച് പരാതി നല്കി. ബാങ്കിന്റെ ക്രമക്കേടുകള് പുറത്തുവരുവാന് കാരണം സുരേഷിന്റെ ഇത്തരം പരാതികളാണ്.
സുരേഷ് ഇരിങ്ങാലക്കുട ജനറല് ആശുപത്രിയില് ചികിത്സയിലാണ്. ഭാര്യ സുനിതയും സഹോദരി സുമനയുമാണ് ആശുപത്രിയില് സുരേഷിന് കൂട്ടിനുള്ളത്. പോലീസ് ഉദ്യോഗസ്ഥര് ആശുപത്രിയില് എത്തിയിരുന്നുവെന്നും കാര്യങ്ങള് നിരീക്ഷിക്കുന്നുണ്ടെന്നും അറിയിച്ചതായി സുരേഷ് പറഞ്ഞു. സുരേഷിനു പോലീസ് സുരക്ഷ ഒരുക്കണമെന്ന് ബിജെപി നേതൃത്വവും ആവശ്യപ്പെട്ടിട്ടുണ്ട്.
