ന്യൂഡൽഹി: ഡൽഹിയിൽ ഇരുപതുകാരനെ എട്ടംഗസംഘം കുത്തികൊലപ്പെടുത്തി. സംഗം വിഹാറിൽ ഇന്നലെ രാത്രിയാണ് സംഭവം. കൊലപാതകത്തിൽ പ്രതികളെന്ന് സംശയിക്കുന്ന എട്ട് പേരെയും പോലീസ് കസ്റ്റഡിയിലെടുത്തിട്ടുണ്ട്. ആക്രമണത്തിൽ ദിൽഷാദ് എന്ന യുവാവാണ് കൊല്ലപ്പെട്ടത്. പ്രായപൂർത്തിയാകാത്ത എട്ട് പേരാണ് കസ്റ്റഡിയിലുള്ളത്.
കഴിഞ്ഞ വർഷം നടന്ന തർക്കമാണ് കൊലപാതകത്തിൽ കലാശിച്ചതെന്നാണ് പ്രാഥമിക വിവരം. പരിക്കേറ്റ യുവാവിനെ ഉടൻ തന്നെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. നെഞ്ചിലും ശരീരത്തിലെ വിവിധ ഇടങ്ങളിലും കുത്തേറ്റ യുവാവിന് വെന്റിലേറ്ററിന്റെ സഹായം നൽകിയിരുന്നു. എന്നാൽ മൊഴി രേഖപ്പെടുത്തുന്നതിന് മുമ്പ് തന്നെ മരിക്കുകയായിരുന്നു.
ആക്രമണത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. ദിൽഷാദിനെ തെരുവിലൂടെ വലിച്ചിഴക്കുന്നതും ഉപദ്രവിക്കുന്നതും വീഡിയോയിലുണ്ട്.
