കൊല്ക്കത്ത: ഡ്യൂറന്റ് കപ്പ് ഫുട്ബോളിന്റെ 132-ാം പതിപ്പിന്റെ കലാശപ്പോരാട്ടത്തില് കൊല്ക്കത്തയില് നിന്നുള്ള ടീമുകളായ മോഹന് ബഗാന് സൂപ്പര് ജയന്റ്സും ഈസ്റ്റ് ബംഗാള് എഫ്സിയും തമ്മില് മത്സരിക്കും. രണ്ടാം സെമിയില് എഫ്സി ഗോവയെ ഒന്നിനെതിരെ രണ്ട് ഗോളുകള്ക്ക് തോല്പ്പിച്ച് മോഹന് ബഗാന് എസ്ജി ഫൈനലിലേക്ക് മുന്നേറി.
മത്സരത്തില് ഒരു ഗോളിന് പിന്നിലായ ശേഷം രണ്ട് ഗോളുകള് തിരിച്ചടിച്ചാണ് മോഹന് ബഗാന് എസ്ജി ഗംഭീര വിജയം നേടിയത്. 23-ാം മിനിറ്റില് നോഹ് ആണ് എഫ്സി ഗോവയ്ക്കുവേണ്ടി കളിയിലെ ആദ്യ ഗോള് കണ്ടെത്തിയത്.
ആദ്യപകുതി തിരും മുമ്പേ മോഹന് ബഗാന് എസ്ജി ഒരു ഗോള് തിരിച്ചടിച്ച് ഒപ്പമെത്തി. 42-ാം മിനിറ്റില് ലഭിച്ച ഫ്രീക്കിക്ക് ലക്ഷ്യത്തിലെത്തിച്ചായിരുന്നു മോഹന് ബഗാന് എസ്ജിയുടെ തിരിച്ചടി. കമിങ്സ് ആണ് ഗോളടിച്ചത്. രണ്ടാം പകുതിയിലേക്ക് കടന്ന മത്സരം 61 മിനിറ്റായപ്പോള് മോഹന് ബഗാന് എസ്ജി വിജയഗോളും നേടി. പ്രതിരോധ താരം സന്ദേശ് ജിങ്കാന് പറ്റിയ പിഴവ് മുതലെടുത്ത മോഹന് ബഗാന് എസ്ജി താരം സാദിക്കു ബോക്സിന് വെളിയില് നിന്ന് അതിമനോഹരമായി തൊടുത്ത ഷോട്ട് ഗോവന് ഗോളി ദീരജിന്റെ ചാട്ടത്തെയും മറികടന്ന് ഗോളാക്കി മാറ്റി.
ഞായറാഴ്ച ഇതേ സ്റ്റേഡിയത്തില് തന്നെയാണ് ഫൈനല്. കൊല്ക്കത്തയിലെ സാള്ട്ട് ലേക്ക് സ്റ്റേഡിയത്തില് നടക്കുന്ന ഫൈനലില് നാട്ടിലെ ടീമുകള് തന്നെ മത്സരിക്കാനൊരുങ്ങുകയാണിവിടെ.
