ന്യൂഡല്ഹി: ന്യൂദല്ഹിയിലെ മെട്രോ സ്റ്റേഷനുകളില് ഖാലിസ്ഥാന് അനുകൂല ചുവരെഴുത്തുകള് പ്രത്യക്ഷപ്പെട്ടതിനെ തുടര്ന്ന് ഇവിടങ്ങളില് പൊലീസ് സുരക്ഷ വര്ദ്ധിപ്പിച്ചു.ശിവജി പാര്ക്, മാദിപൂര്, ഉദ്യോഗ് നഗര്, പഞ്ചാബി ബാഗ് എന്നീ സ്റ്റേഷനുകളിലാണ് ചുവരെഴുത്തുകള് പ്രത്യക്ഷപ്പെട്ടത്.
ചുവരെഴുത്തിന്റെ ദൃശ്യങ്ങള് ഖാലിസ്ഥാന് അനുകൂല സംഘടനയായ സിഖ് ഫോര് ജസ്റ്റിസ് സമൂഹ മാദ്ധ്യമങ്ങളില് പങ്കുവച്ചു. ഇന്ത്യ അധ്യക്ഷത വഹിക്കുന്ന ജി 20ക്ക് എതിരെയും ചുവരെഴുത്തില് പരാമര്ശിക്കുന്നുണ്ട്. ഖാലിസ്ഥാന് രാജ്യം സ്ഥാപിക്കുന്ന കാര്യത്തെ കുറിച്ചും സര്ക്കാരിനെതിരെയുമായിരുന്നു ചുവരെഴുത്തിലെ പരാമര്ശങ്ങള്.
ഇത് ശ്രദ്ധയില് പെട്ടതിനെ തുടര്ന്ന് ചുവരെഴുത്തുകളെല്ലാം പൊലീസ് മായ്ച്ചുകളഞ്ഞു. സംഭവം ഗുരുതര സുരക്ഷാ വീഴ്ചയായാണ് കരുതുന്നത്. ചുവരെഴുത്തിന്പിന്നില് പ്രവര്ത്തിച്ചവരെ കണ്ടെത്തി ശക്തമായ നടപടികള് സ്വീകരിക്കുമെന്ന് പൊലീസ് വ്യക്തമാക്കി.
