കൊല്ലം: ‘മിത്ത് വിവാദത്തില്‍’ പ്രതികരണവുമായി നടന്‍ ഉണ്ണി മുകുന്ദന്‍. ”ഇന്ന് ഗണപതി മിത്താണെന്ന് പറഞ്ഞു. ഇന്നലെ അയ്യപ്പന്‍, നാളെ കൃഷ്ണന്‍, മറ്റന്നാള്‍ ശിവന്‍. ഇതെല്ലാം കഴിഞ്ഞ് നിങ്ങളും മിത്താണെന്നു പറയും” ‘മിത്ത് വിവാദത്തെ സൂചിപ്പിച്ച് നടന്‍ ഉണ്ണി മുകുന്ദന്‍.
മറ്റ് മതങ്ങളെ നാം കണ്ടുപഠിക്കണം. അവരുടെ ആചാരങ്ങളെയോ ദൈവങ്ങളെയോ കുറിച്ചു പറയാന്‍ ആര്‍ക്കും ധൈര്യം പോലുമില്ല. ഏറ്റവും കുറഞ്ഞത് അത്തരത്തിലെങ്കിലും നമ്മള്‍ മുന്നോട്ട് പോകണം. കൊട്ടാരക്കര മഹാഗണപതി ക്ഷേത്രത്തില്‍ വിനായക ചതുര്‍ഥി ആഘോഷത്തില്‍ പങ്കെടുത്തുകൊണ്ട് അദ്ദേഹം പറഞ്ഞു.
”ഇത്തരം വിഷയത്തില്‍ കുറഞ്ഞത് നിങ്ങള്‍ക്ക് വിഷമം ഉണ്ടായെന്നെങ്കിലും പറയണം. ഇവിടെയിരിക്കുന്ന എല്ലാവരുടെയും വീട്ടില്‍ ഒരു ഗണപതി വിഗ്രഹമോ ചിത്രമോ ഉണ്ടാകും.വിഘ്‌നങ്ങളെല്ലാം ശരിയാക്കിത്തരണേ എന്നു പറയാനാണ് ഇവിടെ ക്ഷേത്രത്തില്‍വന്നു പ്രാര്‍ഥിക്കുന്നത്. ഗണപതി ഇല്ലെന്ന് ആരെങ്കിലും പറയുമ്പോള്‍, മര്യാദയുടെ പേരിലെങ്കിലും അദ്ദേഹത്തിനു വേണ്ടി നമ്മള്‍ സംസാരിക്കണം. ദൈവം ഉണ്ടോ എന്നു പലയാളുകള്‍ പല സാഹചര്യത്തില്‍ ചോദിച്ചിട്ടുണ്ട്. മാതാപിതാക്കള്‍ പറഞ്ഞ കാര്യമാണ്, ദൈവം ഉണ്ടെന്നത്. പക്ഷേ, ദൈവം എവിടെ ഉണ്ടെന്നു ചോദിച്ചാല്‍ നമുക്ക് അറിയില്ല. തൂണിലും തുരുമ്പിലും ഹനുമാന്‍ സ്വാമിയുണ്ടെന്നു പറയുമ്പോള്‍, സാങ്കേതികവിദ്യയുടെ ഇന്നത്തെ കാലത്ത് കേള്‍ക്കുമ്പോള്‍ ചിലര്‍ക്കു ചിരി വരും. ജീവിതത്തില്‍ എന്തെങ്കിലും ബുദ്ധിമുട്ട് വരുമ്പോള്‍, ആരെങ്കിലും സഹായിക്കാന്‍ വരുമെന്നും പുറത്തുകടക്കാന്‍ പറ്റുമെന്നും പറയാനുള്ള സങ്കല്‍പമാണു ദൈവം എന്നത് എനിക്കു നല്ല ബോധമുണ്ട്. ആ ബോധം നമുക്ക് എല്ലാവര്‍ക്കും ഉണ്ടാകണമെന്നു പ്രാര്‍ഥിക്കുകയാണ്. നമ്മുടെ ആചാരങ്ങളെക്കുറിച്ചും ദൈവങ്ങളെപ്പറ്റിയും പറയുമ്പോള്‍ സംസാരിക്കാന്‍ മടിക്കരുത്. സംസാരിക്കാനായി ആവേശത്തോടെയും ആര്‍ജവത്തോടെയും മുന്നോട്ടു വരണം.” ഉണ്ണി മുകുന്ദന്‍ പറഞ്ഞു.
