ന്യൂദല്ഹി: ഫയര് സര്വീസ്, സിവില് ഡിഫന്സ്, ഹോം ഗാര്ഡുകള് എന്നിവയിലെ ഉദ്യോഗസ്ഥര്ക്കുള്ള വിവിധ മെഡലുകള് പ്രഖ്യാപിച്ചു. കേരളത്തില് നിന്നുള്ള നാലുപേര് ഉള്പ്പെടെ 53 പേര് ഫയര് സര്വീസ് മെഡലുകള്ക്കും 48 പേര് ഹോം ഗാര്ഡ്, സിവില് ഡിഫന്സ് മെഡലുകള്ക്കും അര്ഹരായി.
ധീരതയ്ക്കുള്ള രാഷ്ട്രപതിയുടെ ഫയര് സര്വീസ് മെഡലിന് മൂന്നു പേരും ധീരതയ്ക്കുള്ള ഫയര് സര്വീസ് മെഡലിന് ഒരാളും വിശിഷ്ട സേവനത്തിനുള്ള രാഷ്ട്രപതിയുടെ ഫയര് സര്വീസ് മെഡലിന് എട്ടുപേരും വിശിഷ്ട സേവനത്തിനുള്ള ഫയര് സര്വീസ് മെഡലിന് 41 പേരും അര്ഹരായി.
വിശിഷ്ട സേവനത്തിനുള്ള രാഷ്ട്രപതിയുടെ ഫയര് സര്വീസ് മെഡലിന് കേരള ഫയര് ഫോഴ്സിലെ കെ.ടി. ചന്ദ്രന് (ഫയര് ആന്ഡ് റെസ്ക്യു ഓഫീസര്-ഡ്രൈവര്), വിശിഷ്ട സേവനത്തിനുള്ള ഫയര് സര്വീസ് മെഡലിന് കേരള ഫയര് ഫോഴ്സിലെ എസ്.പി. ഗോപകുമാര് (സ്റ്റേഷന് ഓഫീസര്), പി.എം. റഷീദ് (സീനിയര് ഫയര് ആന്ഡ് റെസ്ക്യു ഓഫീസര്-ഗ്രേഡ്), നിഷാല് ജലീല് (ഫയര് ആന്ഡ് റെസ്ക്യു ഓഫീസര്) എന്നിവര് അര്ഹരായി.
