ഗയാന: വിന്‍ഡീസിനെതിരയ മൂന്നാം ടി 20യില്‍ ഇന്ത്യ വിജയം സ്വന്തമാക്കിയെങ്കിലും പഴികേട്ട് നായകന്‍ ഹാര്‍ദിക് പാണ്ഡ്യ. കഴിഞ്ഞ രണ്ട് മത്സരങ്ങളിലും മോശം തീരുമാനങ്ങളുടെ പേരില്‍ ഇന്ത്യന്‍ ക്യാപ്റ്റന്‍ ഹാര്‍ദിക് പാണ്ഡ്യ പഴി കേട്ടിരുന്നു. മൂന്നാം മത്സരത്തില്‍ മികച്ച ബാറ്റിങ് പ്രകടനം നടത്തി ടീമിനെ വിജയത്തിലെത്തിച്ചെങ്കിലും ഹാര്‍ദിക്കിനെ ആരാധകര്‍ വിടുന്ന മട്ടില്ല. മത്സരത്തില്‍ സിക്‌സ് അടിച്ചാണ് ഹാര്‍ദിക് പാണ്ഡ്യ ഇന്ത്യയെ പരമ്പരയിലെ ആദ്യ വിജയത്തിലെത്തിച്ചത്. ഈ സമയത്ത് നോണ്‍ സ്‌ട്രൈക്കില്‍ ഉണ്ടായിരുന്ന തിലക് വര്‍മയ്‌ക്ക് അര്‍ധ സെഞ്ചറി തികയ്‌ക്കാന്‍ ഒരു റണ്‍ കൂടി മതിയായിരുന്നു.
ഓവറുകള്‍ ആവശ്യത്തിന് ബാക്കിയുണ്ടായിരുന്നിട്ടും തിലകിന് അര്‍ധ സെഞ്ചറി തികയ്‌ക്കാന്‍ ഹാര്‍ദിക് സ്‌ട്രൈക്ക് നല്‍കിയില്ലെന്നാണ് ആരാധകരുടെ പരാതി. റോവ്മന്‍ പവലിന്റെ 18ാം ഓവറിലെ അഞ്ചാം പന്തിലാണ് ഹാര്‍ദിക് പാണ്ഡ്യ സിക്‌സര്‍ പറത്തിയത്. ഹാര്‍ദിക് പാണ്ഡ്യയുടെ ഏറ്റവും വെറുക്കപ്പെട്ട സിക്‌സ് ഇതായിരിക്കുമെന്ന് എക്‌സ് പ്ലാറ്റ്‌ഫോമില്‍ (ട്വിറ്റര്‍) ഒരു ആരാധകന്‍ വിമര്‍ശിച്ചു.
ഹാര്‍ദിക്കിന് ഫിനിഷറെന്ന് പേരെടുക്കാനാണ് ഒരു സഹതാരത്തിന് അര്‍ധ സെഞ്ചറി നിഷേധിച്ചതെന്ന് മറ്റൊരു ആരാധകന്‍ സമൂഹമാധ്യമത്തില്‍ കുറിച്ചു.
