കഭി ഖുഷി കഭി ഗം എന്ന ചിത്രത്തിലെ പൂ എന്ന് വിളിപ്പേരുളള പൂജ ശര്മ്മ എന്ന കഥാപാത്രത്തെ കരീന കപൂര് പ്രേക്ഷകര്ക്ക് സമ്മാനിച്ചിട്ട് 22 വര്ഷമായി. സിനിമകള് നിരവധി വന്നുപോയെങ്കിലും ആ കഥാപാത്രം കരീനയുടെ ഏറ്റവും പ്രേക്ഷക പ്രീതി നേടിയ ചിത്രങ്ങളിലൊന്നാണ്.
പൂവിന്റെ കുട്ടിക്കാലം അവതരിപ്പിച്ച മാളവിക രാജിനും ധാരാളം ആരാധകരെ നേടിക്കൊടുത്ത ചിത്രമാണിത്. പിന്നീട് റിന്സിന് ഡെന്സോങ്പയ്ക്കൊപ്പം സ്ക്വാഡ് എന്ന ആക്ഷന് ചിത്രത്തിലൂടെ മാളവിക രാജ് മുതിര്ന്ന കഥാപാത്രത്തെയും അവതരിപ്പിച്ചു.
ഇപ്പോള് മാളവിക രാജിന്റെ വിവാഹ നിശ്ചയമാണ് വാര്ത്തയായിരിക്കുന്നത്.വ്യവസായി പ്രണവ് ബഗ്ഗയുമായി വിവാഹനിശ്ചയം കഴിഞ്ഞ വിവരം നടി ഇന്സ്റ്റാഗ്രാമിലൂടെ അറിയിച്ചു. തുര്ക്കിയിലെ കപ്പഡോഷ്യയിലാണ് ചടങ്ങി നടന്നത്.
തുറന്ന സ്ഥലത്ത് ബലൂണുകളുടെ പശ്ചാത്തലത്തില് മാളവികയോട് വിവാഹാഭ്യര്ത്ഥന നടത്തുന്ന പ്രണവ് ബഗ്ഗയുടെ ചിത്രം നടി പങ്കുവച്ചു. പ്രണവ് പ്രതിശ്രുത വധുവിന്റെ നെറ്റിയില് ചുംബിക്കുന്ന ചിത്രവുമുണ്ട്. മാളവികയുടെ കൈകളില് പിടിച്ച് നില്ക്കുന്ന പ്രണവിനെയും കാണാം.
മാളവിക തൂവെള്ള ഗൗണും പ്രണവ് അതേനിറമുളള സ്യൂട്ടുമാണ് വിവാഹ നിശ്ചയ ചടങ്ങില് ധരിച്ചിരിക്കുന്നത്.
