പ്രശസ്ത ഷോ കോന്‍ ബനേഗ ക്രോര്‍പതി സീസണ്‍ 15-ന്റെ വരവറിയിച്ച് സോണി ടി വി.അമിതാഭ് ബച്ചനെ കാട്ടുന്ന പ്രൊമോയില്‍
ഇതൊരു ‘പുതിയ തുടക്കം’ എന്നാണ് പറയുന്നത്. റിയാലിറ്റി ഷോ ഓഗസ്റ്റ് 14 ന് രാത്രി 9 മണിക്ക് സ്‌ക്രീനിലെത്തുമെന്നാണ് അറിയിച്ചിട്ടുളളത്.
അമിതാഭ് ബച്ചന്‍ ഷോയിലേക്ക് മടങ്ങിയെത്തുമ്പോള്‍ അദ്ദേഹത്തിന് അനുയോജ്യമായ തരത്തിലാണ് ആദ്യ പ്രൊമോ തയാറാക്കിയിട്ടുളളത്. സ്റ്റേജില്‍ താരം എത്തുമ്പോള്‍ സദസിലുള്ളവര്‍ നിറഞ്ഞ കൈയടിയോടെയാണ് സ്വീകരിക്കുന്നത്. ‘പുതിയ തുടക്കം’ എന്ന ഹാഷ്ടാഗ് ഉപയോഗിച്ചിരിക്കുന്നു.
പുതിയ ഇന്ത്യയെയും അതിന്റെ മാറ്റവും ആഘോഷിക്കുന്നതിനാണ് ഈ സീസണ്‍ അവതരിപ്പിക്കുന്നത്. ഗെയിം ഷോയില്‍ കാണികള്‍ക്കും മത്സരാര്‍ത്ഥികള്‍ക്കും വ്യത്യസ്തത അനുഭവപ്പെടുമെന്നാണ് അണിയറ പ്രവര്‍ത്തകര്‍ പറയുന്നത്.
ജനപ്രിയ അമേരിക്കന്‍ ഗെയിം ഷോ ഹൂ വാണ്ട്‌സ് ടു ബി എ മില്യണയറിന്റെ ഹിന്ദി പതിപ്പാണ് കോന്‍ ബനേഗ ക്രോര്‍പതി . 2000-ലാണ് ഇത് ആദ്യമായി ടിവിയില്‍ എത്തുന്നത്.കെബിസിയുടെ ആദ്യ സീസണ്‍ മുതല്‍ അമിതാഭ് ബച്ചന്‍ അവതാരകനാണ്. എന്നാല്‍ സീസണ്‍ 3ല്‍ ഷാരൂഖ് ഖാന് അവതാരകനായെത്തി. പിന്നീട്, അമിതാഭ് ബച്ചന്‍ ഷോയിലേക്ക് മടങ്ങിയെത്തി. അന്നുമുതല്‍ കെബിസിയുടെ മുഖമായി താരം മാറി. ഈ വര്‍ഷം ഏപ്രിലില്‍ കോന്‍ ബനേഗ ക്രോര്‍പതി സീസണ്‍ 15-ന്റെ രജിസ്‌ട്രേഷന്‍ ആരംഭിച്ചിരുന്നു..
കോന്‍ ബനേഗ ക്രോര്‍പതി സീസണ്‍ 15 ന് പുറമെ പ്രഭാസ്, ദീപിക പദുക്കോണ്‍, കമല്‍ ഹാസന്‍, ദിഷാ പടാനി എന്നിവര്‍ക്കൊപ്പം കല്‍ക്കി 2898 എ ഡിയിലാണ് അമിതാഭ് അടുത്തതായി അഭിനയിക്കുന്നത്. നാഗ് അശ്വിന്‍ സംവിധാനം ചെയ്യുന്ന ചിത്രം നിര്‍മ്മിച്ചിരിക്കുന്നത് വൈജയന്തി മൂവീസാണ്.
