തൃശൂര്: പതിനഞ്ചുകാരിക്ക് കള്ള് നല്കിയ ഷാപ്പിന്റെ ലൈസന്സ് റദ്ദാക്കി എക്സൈസ് കമ്മീഷണര്. വാടാനപ്പള്ളി തമ്പാന്കടവ് കള്ള് ഷാപ്പിന്റെ ലൈസന്സാണ് റദ്ദാക്കിയത്. അബ്കാരി ചട്ടം ലംഘിച്ചെന്ന് കണ്ടെത്തിയ സാഹചര്യത്തിലാണ് നടപടി.
ഈ മാസം രണ്ടിനാണ് സംഭവം. ആണ്സുഹൃത്തിനൊപ്പം സ്നേഹതീരം ബീച്ചിലെത്തിയ പതിനഞ്ചുകാരി ഷാപ്പില് കയറി മദ്യപിച്ചിരുന്നു. തുടര്ന്ന് പൊലീസ് പരിശോധനയില് പിടിയിലാവുകയും ചെയ്തു. പൊലീസ് വിവരം തിരക്കിയതോടെ പെണ്കുട്ടിക്ക് പ്രായപൂര്ത്തിയായിട്ടില്ലെന്ന് കണ്ടെത്തി. തുടര്ന്ന് സുഹൃത്തിനെയും ഷാപ്പ് മാനേജരെയും അറസ്റ്റ് ചെയ്തു. റിമാന്ഡിലായിരുന്ന ഇവര് ഒരാഴ്ച മുമ്പാണ് പുറത്തിറങ്ങിയത്. ഷാപ്പ് നടത്തിയിരുന്ന ഗ്രൂപ്പിന്റെ ഉടമസ്ഥതയിലുള്ള മറ്റ് ആറ് ഷാപ്പുകള്ക്കും നോട്ടീസ് നല്കിയിട്ടുണ്ട്.
