കൊച്ചി : നടന് സുരാജ് വെഞ്ഞാറമ്മൂട് സഞ്ചരിച്ച കാറുമായി കൂട്ടിയിടിച്ച് ബൈക്ക് യാത്രികന് പരിക്ക്. മലപ്പുറം മഞ്ചേരി സ്വദേശി ശരത്തിനാണ് പരിക്കേറ്റത്. കാലിന് സാരമായ പരിക്കേറ്റ ഇയാളെ പാലാരിവട്ടത്തെ സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്.
ശനിയാഴ്ച രാത്രിയോടെ എറണാകുളം പാലാരിവട്ടത്തുവെച്ചാണ് അപകടം സംഭവിക്കുന്നത്. കൊച്ചിയില് നിന്ന് തിരുവനന്തപുരം ഭാഗത്തേക്ക് പോവുകയായിരുന്നു സുരാജ്. ഇതേസമയം എതിര്ദിശയില് വന്ന ബൈക്കുമായി സുരാജിന്റെ കാര് കൂട്ടിയിടിക്കുകയായിരുന്നു. അപകടത്തില് സുരാജിന് കാര്യമായ പരിക്കുകളില്ല.
പരിക്കേറ്റ ശരത്തിന്റെ കാലിന് ശസ്ത്രക്രിയ വേണ്ടിവരുമെന്നാണ് ആശുപത്രിവൃത്തങ്ങള് അറിയിച്ചിരിക്കുന്നത്. സുരാജ് ആശുപത്രിയിലെത്തി ഇയാളെ കണ്ടിരുന്നു. അപകടത്തില് പാലാരിവട്ടം പോലീസ് കേസെടുത്തിട്ടുണ്ട്.
