കോഴിക്കോട്: സ്പീക്കര്‍ എ.എന്‍.ഷംസീറിനു നേരെ കയ്യോങ്ങുന്ന യുവമോര്‍ച്ചക്കാരന്‍ മോര്‍ച്ചറിയിലായിരിക്കും പോകേണ്ടിവരികയെന്ന സിപിഎം നേതാവും ഖാദി ബോര്‍ഡ് ഉപാധ്യക്ഷനുമായ പി.ജയരാജന്റെ പ്രസ്താവനയോടു കടുത്ത ഭാഷയില്‍ പ്രതികരിച്ച് ബിജെപി സംസ്ഥാന വൈസ് പ്രസിഡന്റ് ശോഭ സുരേന്ദ്രന്‍ രംഗത്ത്. വയസുകാലത്ത് അടങ്ങി വീടിനുളളില്‍ ഇരിക്കുന്നതാണ് ജയരാജനു നല്ലതെന്ന് ശോഭാ സുരേന്ദ്രന്‍ മുന്നറിയിപ്പു നല്‍കി.
പന്ന്യന്നൂര്‍ ചന്ദ്രന്‍, അശ്വനി, കെ.ടി.ജയകൃഷ്ണന്‍ തുടങ്ങി ഒരുപാടു പേരെ നിങ്ങള്‍ മോര്‍ച്ചറിയിലാക്കിയിട്ടുണ്ട്. എന്നാല്‍ ഈ പറയുന്നതിനുള്ള ആവതൊന്നും ഇപ്പോള്‍ ജയരാജനില്ല. തന്നെ ഊരുവിലക്കാന്‍ നട്ടെല്ലുള്ള ഒരു രാഷ്‌ട്രീയക്കാരനും കേരളത്തിലില്ലെന്നും ശോഭ സുരേന്ദ്രന്‍ പറഞ്ഞു.
കാലം കുറേ മുന്നോട്ടു പോയെന്നത് ജയരാജന്‍ മനസിലാക്കണം. നിങ്ങളേപ്പോലെയുള്ള ഗുണ്ടാ മാഫിയ നേതാക്കളുടെ വാക്ക് കേട്ട് പിണറായി വിജയന്റെ മുന്നില്‍ തലകുനിച്ച് നില്‍ക്കുന്നവരാണ് യുവമോര്‍ച്ചക്കാരും ബിജെപിക്കാരും എന്നുള്ള ധാരണയൊന്നും വേണ്ട.
ലീഗിന്റെ കുത്തകപ്പാട്ടം എങ്ങനെയാണ് ജയരാജന്‍ ഏറ്റെടുക്കുന്നതെന്നും ശോഭ സുരേന്ദ്രന്‍ ചോദിച്ചു. ഇവിടെ സമാധാനത്തോടും ശാന്തിയോടും കൂടി പ്രവര്‍ത്തിച്ചു മുന്നോട്ടു പോകണം എന്നുള്ളതിന്റെ തെളിവാണല്ലോ അന്വേഷണ ഏജന്‍സി വന്നത്. ഇന്ത്യ നമ്മുടെ അമ്മയാണ്. ജയരാജന്റെ പാര്‍ട്ടിക്കാര്‍ക്ക് ഒരു നിയമം, എന്റെ പാര്‍ട്ടിക്കാര്‍ക്ക് മറ്റൊരു നിയമം എന്നൊന്നുമില്ല. ഒരു അക്രമത്തിനും പോകേണ്ടതില്ല.
പ്രതികരിക്കാൻ ഇവിടെ എഴുതുക: