തിരുവനന്തപുരം: വൈദ്യുതി മേഖലയില് കേന്ദ്ര ധനസഹായത്തോടെ നടപ്പാക്കുന്ന സ്മാര്ട്ട് മീറ്റര് പദ്ധതിയോട് സംസ്ഥാന സര്ക്കാര് നിസഹകരിക്കുന്നത് അഴിമതി നടക്കില്ലെന്ന് മനസിലായതുകൊണ്ടാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. ഇതോടെ കേരളം പ്രസരണ വിതരണ നവീകരണ പദ്ധതിയില് നിന്നു (ആര്ഡിഎസ്എസ്) പുറത്താകും.
10,475 കോടി രൂപയുടെ കേന്ദ്രപദ്ധതി സംസ്ഥാനത്തിന് നഷ്ടപ്പെടുത്തുന്ന ഇടതുസര്ക്കാര് ജനങ്ങളെ വഞ്ചിക്കുകയാണ്. തിരിച്ചടയ്ക്കേണ്ടതില്ലാത്ത 2000 കോടി രൂപയിലേറെ കേന്ദ്ര ഗ്രാന്റും ഇതോടെ സംസ്ഥാനത്തിന് നഷ്ടമാവുകയാണ്. ഇടതുപക്ഷ തൊഴിലാളി സംഘടനകളുടെ സമ്മര്ദ്ദത്തിന് വഴങ്ങിയാണ് സര്ക്കാര് തെറ്റായ നിലപാട് സ്വീകരിച്ചിരിക്കുന്നത്. രാജ്യത്താകമാനം സ്മാര്ട്ട് മീറ്റര് പദ്ധതി നടപ്പിലാകുമ്പോള് കേരളം അതില് നിന്നും പുറത്താകുന്നത് അങ്ങേയറ്റം നാണക്കേടാണ്.
തൊഴിലാളി യൂണിയന് നേതാക്കള്ക്ക് തട്ടിപ്പ് നടത്താന് ജനങ്ങളെ ദ്രോഹിക്കുന്ന ഇടതുസര്ക്കാരിന്റെ നയങ്ങളുടെ ഏറ്റവും ഒടുവിലത്തെ ഉദാഹരണമാണിത്. എല്ലാ പദ്ധതികളും അഴിമതി നടത്താനുള്ള ഉപാധിയാക്കുന്ന പിണറായി സര്ക്കാരിന് സുതാര്യമായ കേന്ദ്രസര്ക്കാര് പദ്ധതികളോട് ഒരിക്കലും യോജിച്ച് പോവാന് സാധിക്കാറില്ല. പുരോഗമനപരമായ കാര്യങ്ങളെ എതിര്ക്കുക എന്നത് എല്ലാ കാലത്തും സിപിഎമ്മിന്റെ നയമാണെന്നും കെ.സുരേന്ദ്രന് പറഞ്ഞു.
