കൊച്ചി: സംസ്ഥാനത്തിന്റെ വികസനത്തിനായി അനിവാര്യം അതിവേഗ റെയില്‍ ആണെന്ന് മെട്രോമാന്‍ ഇ.ശ്രീധരന്‍. സില്‍വര്‍ ലൈന്‍ പദ്ധതി അപ്രായോഗികമാണെന്നും അതിന് കേന്ദ്രാനുമതി കിട്ടുമെന്ന് പ്രതീക്ഷിക്കുന്നില്ലെന്നും ശ്രീധരന്‍ വ്യക്തമാക്കി. അതിവേഗ റെയില്‍ സംബന്ധിച്ച റിപ്പോര്‍ട്ട് ഉമ്മന്‍ചാണ്ടി സര്‍ക്കാരാണ് ആവശ്യപ്പെട്ടത്.
അത് സംബന്ധിച്ച റിപ്പോര്‍ട്ട് പഠിച്ച് സമര്‍പ്പിച്ചിരുന്നു. കെ വി തോമസിന് പുതിയ പദ്ധതി സംബന്ധിച്ച് നോട്ട് നല്‍കിയിട്ടുണ്ട്. കെ.വി തോമസ് അത് മുഖ്യമന്ത്രിക്ക് കൈമാറി. അദ്ദേഹം താനുമായി കൂടിക്കാഴ്ച നടത്തിയത് മുഖ്യമന്ത്രിയുടെ അറിവോടെയാണ്.
അതി വേഗ റെയില്‍ പദ്ധതി ആകാശ പാതയായോ തുരങ്ക പാതയായോ നടപ്പാക്കാമെന്നും അദ്ദേഹം അഭിപ്രായപ്പെട്ടു. കുറഞ്ഞ അളവില്‍ ഭൂമിയെടുത്താല്‍ പാത യാഥാര്‍ത്ഥ്യമാക്കാം. നടത്തിപ്പിന് ഇന്ത്യന്‍ റെയില്‍വെയെയോ ഡല്‍ഹി മെട്രോയേയോ ഏല്‍പ്പിക്കാമെന്നും അദ്ദേഹം പറഞ്ഞു. ഹൈ സ്പീഡോ, സെമി ഹൈസ്പീഡ് റെയിലോ ആണ് അഭികാമ്യം. തന്റെ നിര്‍ദ്ദേശങ്ങള്‍ക്ക് സംസ്ഥാന സര്‍ക്കാരില്‍ നിന്ന് മറുപടി ലഭിച്ചില്ലെന്നും ഇ.ശ്രീധരന്‍ പറഞ്ഞു.കേരളത്തിന്റെ വികസനത്തില്‍ സഹകരിക്കുമെന്നും അതില്‍ രാഷ്‌ട്രീയം നോക്കില്ലെന്നും വ്യക്തമാക്കി മെട്രോമാന്‍ ഇ.ശ്രീധരന്‍.
പ്രതികരിക്കാൻ ഇവിടെ എഴുതുക: