കൊല്‍ക്കത്ത: തൃണമൂല്‍ സര്‍ക്കാര്‍ ഇനിയും ബംഗാളില്‍ അധികാരത്തില്‍ വന്നാല്‍ സ്ത്രീകള്‍ക്ക് നേരെ അതിക്രമങ്ങള്‍ വര്‍ദ്ധിക്കുമെന്ന് ബിജെപി ദേശീയ അധ്യക്ഷന്‍ നിതിന്‍ നബീന്‍. ബലുര്‍ഘട്ടില്‍ ബിജെപിയുടെ റാലിയെ അഭിസംബോധന ചെയ്യുകയായിരുന്നു അദ്ദേഹം.
ടിഎംസി സര്‍ക്കാര്‍ ബംഗാളിലെ സ്ത്രീകളുടെ സുരക്ഷ ഉറപ്പാക്കുന്നതില്‍ പരാജയപ്പെട്ടു. ആര്‍ജി കാര്‍ ആശുപത്രിയിലും ദുര്‍ഗാപൂരിലെ മെഡിക്കല്‍ കോളജിലും നടന്ന സംഭവങ്ങള്‍ ഇതിന് ഉദാഹരണങ്ങളാണ്. ബംഗാള്‍ മുഖ്യമന്ത്രി മമത ബാനര്‍ജി ഒരു സ്ത്രീയാണെങ്കിലും, ലോക്‌സഭയില്‍ വനിതാ സംവരണ ബില്‍ പാസാക്കാതിരിക്കാന്‍ ഇവര്‍ കോണ്‍ഗ്രസ് പോലുള്ള പാര്‍ട്ടികളുമായി ഗൂഢാലോചന നടത്തി ബംഗാളിലെ സ്ത്രീകളെ വഞ്ചിച്ചു.
ബംഗാളില്‍ നിന്ന് അനധികൃത കുടിയേറ്റക്കാരെ തുരത്താനും, ജനസംഖ്യാപരമായ മാറ്റം തടയാനും, ദേശീയ സുരക്ഷ സംരക്ഷിക്കാനും ടിഎംസിയെ അധികാരത്തില്‍ നിന്ന് നീക്കം ചെയ്യേണ്ടത് അത്യാവശ്യമാണ്. അതിനാല്‍ മമതയെ ഒരു പാഠം പഠിപ്പിക്കാന്‍ സംസ്ഥാനത്തെ വനിതാ വോട്ടര്‍മാരെല്ലാവരും ഉറച്ച തീരുമാനമെടുക്കണമെന്നും നിതിന്‍ നബീന്‍ പറഞ്ഞു.
എല്ലാ മേഖലകളിലും സംസ്ഥാനത്തിന്റെ ക്ഷേമവും സുരക്ഷയും ഉറപ്പാക്കുന്ന ഒരു സര്‍ക്കാര്‍ ബംഗാളില്‍ നമുക്ക് ആവശ്യമാണ്. അതിനായി വോട്ടര്‍മാര്‍ എല്ലാവരും ബിജെപിയെ പിന്തുണയ്‌ക്കണം. ബിജെപി ബംഗാളില്‍ അധികാരത്തിലെത്തിയാല്‍ അനധികൃത കുടിയേറ്റക്കാരെ പുറത്താക്കി നല്ല ഭരണം ഉറപ്പാക്കും. ഇതോടെ സംസ്ഥാനത്തെ എല്ലാ പൗരന്മാര്‍ക്കും സുരക്ഷിതമായ അന്തരീക്ഷത്തില്‍ സമാധാനപരമായി ജീവിക്കാന്‍ കഴിയുമെന്നും അദ്ദേഹം പറഞ്ഞു.
ആര്‍ട്ടിക്കിള്‍ 370 റദ്ദാക്കിയതും പാകിസ്ഥാന്‍ പിന്തുണയുള്ള ഭീകരര്‍ക്കെതിരായ സര്‍ജിക്കല്‍ സ്‌ട്രൈക്കുകളും ചൂണ്ടിക്കാട്ടി പ്രധാനമന്ത്രി നരേന്ദ്ര മോദി വാഗ്ദാനങ്ങള്‍ പാലിക്കുകയും ദേശീയ സുരക്ഷയ്‌ക്ക് മുന്‍ഗണന നല്‍കുകയും ചെയ്തുവെന്ന് നിതിന്‍ നബീന്‍ പറഞ്ഞു.
