കര്ണാവതി (ഗുജറാത്ത്): വിഭജനം ഇന്ത്യാ ചരിത്രത്തിലെ കറുത്ത ഏടാണെന്നും അത് തിരുത്തണമെന്നും ആര്എസ്എസ്. പാകിസ്ഥാനില് നിന്ന് ഇന്ത്യയിലെത്തിയ ഡോക്ടര്മാരുടെ സംഘടന മൈഗ്രന്റ് പാക് ഹിന്ദു ഡോക്ടേഴ്സ് ഫോറം സംഘടിപ്പിച്ച ഗുരുപൂര്ണിമ മഹോത്സവത്തില് സംസാരിക്കവേയാണ് സര്കാര്യവാഹ് ദത്താത്രേയ ഹൊസബാളെ നിലപാട് ശക്തമായി ആവര്ത്തിച്ചത്. എല്ലാ വര്ഷവും ആര്എസ്എസ് അഖണ്ഡ ഭാരത പ്രതിജ്ഞയെടുക്കുന്നത് വെറുതേയല്ലെന്നും സര്കാര്യവാഹ് പറഞ്ഞു.
ലോകത്തിനാകെ മാര്ഗ ദര്ശനം നല്കുന്ന വിശ്വഗുരുവാണ് ഭാരതം. ഒരിക്കല് അകന്നു പോകുകയും വീണ്ടും ഈ വിശ്വഗുരുവിന്റെ തണലില് ഭാരതത്തിലെ പൗരന്മാരായി മാറുകയും ചെയ്ത ജനങ്ങളുടെ ഇടയില് നില്ക്കാന് കഴിയുന്നത് അഭിമാനകരമാണ്. വിഭജിച്ച് അകന്നുപോയ ഭാരതത്തിന്റെ ആ ഭൂവിഭാഗത്തില് തുടരുന്നവര്ക്കും അവിടെ അടിച്ചമര്ത്തപ്പെട്ടവര്ക്കും ഇത് സ്വന്തം വീടാണ്. ഇവിടേക്കല്ലാതെ മറ്റെവിടേക്കാണ് അവര് മടങ്ങിയെത്തേണ്ടത്. മടങ്ങിയെത്തിയ നിങ്ങള് ഇന്ന് ഇന്ത്യന് പൗരന്മാരാണ്. എന്നാല് ഇനിയുമെത്രയോ പേര് അവിടെ ഇപ്പോഴും കഷ്ടപ്പെടുന്നു. അവരെ സേവിക്കണം. സേവനമാണ് നമ്മുടെ ധര്മം. ദുരിതമനുഭവിക്കുന്നവരെ സഹായിക്കേണ്ടത് നമ്മുടെ കടമയാണ്. അഖണ്ഡ ഭാരതം വീണ്ടും സാക്ഷാത്കരിക്കണമെങ്കില് പാകിസ്ഥാനിലെ നിങ്ങളുടെ സ്വന്തം ഗ്രാമത്തെക്കുറിച്ചുള്ള സ്വപ്നങ്ങള് മായാതെ സൂക്ഷിക്കണം, അദ്ദേഹം ഓര്മിപ്പിച്ചു.
നാമോരോരുത്തരും ഭാരത മാതാവിന്റെ മക്കളാണ്. നിയമപരമായി ഇന്ത്യന് പൗരന്മാരാണ്. ഈ നാട് ലോകത്തിന്റെ മാതാവാണ്. ലോകത്തെമ്പാടും നിന്ന് ആട്ടിയോടിക്കപ്പെട്ട, അടിച്ചമര്ത്തപ്പെട്ട ജനങ്ങള്ക്ക് ഇതൊരു അഭയസ്ഥാനമാണ്. കുറച്ചു കാലം മുമ്പ്, വിവിധ രാജ്യങ്ങളില് നിന്ന് മടങ്ങിയെത്തിയ പൗരന്മാരുടെ അനുഭവങ്ങള് പ്രസിദ്ധീകരിക്കാന് ഇസ്രായേല് തീരുമാനിച്ചു. ലോകമെമ്പാടുമുള്ള രാജ്യങ്ങളില് നിന്ന് മടങ്ങിയെത്തിയ ജൂതന്മാരുടെ കുറിപ്പുകളില് അവര് അനുഭവിച്ച പീഡനങ്ങളുടെ കഥകളായിരുന്നു. എന്നാല് ഇന്ത്യയില് നിന്ന് മടങ്ങിയെത്തിയവര് ഈ നാട് നല്കിയ വരവേല്പ്പിനെയും ബഹുമാനത്തെയും കുറിച്ച് വര്ണിച്ചു. വസുധൈവ കുടുംബകം എന്നത് നമുക്ക് ആപ്തവാക്യം മാത്രമല്ല, സാധാരണക്കാരന് അനുഷ്ഠിക്കുന്ന ജീവിതചര്യ കൂടിയാണ്, ദത്താത്രേയ ഹൊസബാളെ ചൂണ്ടിക്കാട്ടി.
സിഎഎയ്ക്കെതിരേ രാജ്യത്ത് ശക്തമായ പ്രചാരണം നടന്നു. അത്തരം തടസ്സങ്ങള് നീക്കാനുള്ള അന്തരീക്ഷം നാമൊരുമിച്ച് സൃഷ്ടിക്കേണ്ടതുണ്ട്. വിഭജന കാലത്തെ ദുരനുഭവങ്ങള് മറക്കാനുള്ളതല്ല. അന്ന് പാകിസ്ഥാനില് നിന്ന് പലായനം ചെയ്ത് ഇവിടെയെത്തിയവരുടെ അനുഭവങ്ങള് നമ്മുടെ മുന്നിലുണ്ട്. ഭാവി തലമുറയും ഇത് തിരിച്ചറിയണം. അക്കാലത്ത് പാകിസ്ഥാനില് ദുരിതമനുഭവിക്കുന്ന ഒരു ഹിന്ദുവെങ്കിലും ബാക്കിയുള്ള കാലം വരെ സ്വയംസേവകര് അവിടെത്തങ്ങണമെന്നായിരുന്നു ഗുരുജി ഗോള്വല്ക്കര് നല്കിയ നിര്ദേശം, സര്കാര്യവാഹ് പറഞ്ഞു. ഗുജറാത്ത് മുഖ്യമന്ത്രി ഭൂപേന്ദ്ര ഭായ് പട്ടേല് ചടങ്ങില് പങ്കെടുത്തു.
