കാസര്കോട്: ചിന്മയമിഷന്കേരള മേധാവിയും കാസര്കോട് ചിന്മയ വിദ്യാലയ, കോളേജ് എന്നിവയുടെ അധ്യക്ഷനും ചിന്മയ മിഷന് മുതിര്ന്ന ആചാര്യനുമായ സ്വാമി വിവിക്താനന്ദ സരസ്വതിയുടെ സപ്തതി ആഘോഷം പ്രൗഢഗംഭീരം. വിദ്യാനഗര് ചിന്മയ ക്യാമ്പസിലെ തേജസ് ഓഡിറ്റോറിയത്തിലാണ് പരിപാടികള് നടന്നത്.വിദ്യാര്ത്ഥികളുടെ വേദ മന്ത്രധ്വനികളാല് മുഖരിതമായ വേദിയിലേക്ക് ഘോഷയാത്രയോടെ ആരതി ഉഴിഞ്ഞാണ് ഗോവാ ഗവര്ണര് അഡ്വ.പി.എസ്.ശ്രീധരന്പിള്ളയെ ചിന്മയ മിഷന് ഭാരവാഹികള് ആനയിച്ചത്.
തന്റെ ജീവിതം സനാതന ധര്മ്മത്തിന്റെ പ്രചരണത്തിനുവേണ്ടി സമര്പ്പിക്കുകയും ചിന്മയ മിഷന് എന്ന ചട്ടക്കൂടില് ഒതുങ്ങിനില്ക്കാതെ അവശ്യഘട്ടങ്ങളില് അതിനു പുറത്തു വന്ന് പൊതുസമൂഹത്തിന്റെ ഉന്നമനത്തിനുവേണ്ടി പ്രവര്ത്തിക്കുകയും ചെയ്യുന്ന പുണ്യാത്മാവാണ് സ്വാമി വിവിക്താനന്ദ സരസ്വതിയെന്ന് ഉദ്ഘാടന പ്രസംഗത്തില് ഗോവ ഗവര്ണ്ണര് അഭിപ്രായപ്പെട്ടു. കോഴിക്കോട് കൊളത്തൂര് അദൈ്വതാശ്രമം മഠാധിപതി ചിദാനന്ദപുരി മംഗളാശംസകള് അര്പ്പിച്ചു.
സംസ്ഥാനത്തെ ചിന്മയമിഷന്റെ പ്രവര്ത്തനങ്ങള്ക്കെന്നും കരുത്ത് പകരുന്ന തണലേക്കുന്ന മഹാ വൃക്ഷമാണ് സ്വാമി വിവിക്താനന്ദസരസ്വതിയെന്ന് ചിദാനന്ദപുരി സ്വാമി പറഞ്ഞു. സപ്തതി ആഘോഷം നടത്തുന്നതിനേക്കാള് അതുകൊണ്ട് സമൂഹത്തനും ചിന്മയമിഷനും ഗുണമുണ്ടാകണമെന്ന് ആഗ്രഹിക്കുന്ന വ്യക്തിത്വത്തിന്റെ ഉടമയാണ് അദ്ദേഹം. എല്ലാകാര്യത്തിലും സ്വാമിജിയുടെ സാനിധ്യം ഉണ്ടാകുന്നുവെന്നും അദ്ദേഹം പറഞ്ഞു.ആഘോഷത്തോടനുബന്ധിച്ച് കാസര്കോട് ചിന്മയമിഷന്റെ നേതൃത്വത്തില് നിരവധി സേവന പ്രവര്ത്തനങ്ങള് നടപ്പിലാക്കി.
ഭവന രഹിതര്ക്കൊരു ഭവനം പദ്ധതിയുടെ ഭാഗമായി നിര്മ്മിച്ച ഏഴാമത്തെ വീടിന്റെ താക്കോല് കാസര്കോട് ചിന്മയ വിദ്യാലയ അധ്യാപിക ഗിരിജകുമാരിക്ക് കൈമാറി. ചിന്മയരശ്മിയുടെ നേതൃത്വത്തില് പൊതു വിദ്യാലയങ്ങളിലെ നിര്ധനരായ വിദ്യാര്ത്ഥികള്ക്ക് പഠനോപകരണങ്ങളും യൂണിഫോമും വിതരണം ചെയ്തു, നീര്ച്ചാലിലെ വയോജനമന്ദിരത്തിലെ അന്തേവാസികള്ക്ക് അന്നദാനവും നടത്തപ്പെട്ടു. ചിന്മയ വിദ്യാലയത്തില് വിദ്യാര്ത്ഥികള്ക്കായി നിര്മ്മിച്ച നീന്തല്ക്കുളത്തിന്റെ ഉദ്ഘാടനവും തദവസരത്തില് നടത്തപ്പെട്ടു. തുടര്ന്ന് വിവിക്താനന്ദസരസ്വതി സ്വാമികള്ക്ക് ദക്ഷിണ സമര്പ്പണവും ഉപഹാര സമര്പ്പണവും നടന്നു. സപ്തതിയുടെ ഭാഗമായി കഴിഞ്ഞ ദിവസം മൃത്യുഞ്ജയഹോമം നടന്നു.
