തിരുവനന്തപുരം: മദ്യപിച്ച് വീട്ടുവളപ്പില് അതിക്രമിച്ചുകടക്കാന് ശ്രമിച്ചുവെന്നാരോപിച്ച് പോലീസുകാരനെ നടുറോഡിലിട്ട് മര്ദിച്ച സിപിഎം ബ്രാഞ്ച് സെക്രട്ടറി ഉള്പ്പെടെയുള്ള സംഘം പോലീസ് പിടിയില്. സിപിഎം ബ്രാഞ്ച് സെക്രട്ടറി ബേക്കറി ജങ്ഷനില് കുന്നുവിളാകത്ത് വീട്ടില് സെല്വരാജ്(57), സെല്വരാജന്റെ സഹോദരന് സുന്ദരന്(55), ശ്രീരുദ്രാ വീട്ടില് അഖില് (32) എന്നിവരെയാണ് മ്യൂസിയം പോലീസ് പിടികൂടിയത്. തിരുവനന്തപുരം ടെലി കമ്മ്യൂണിക്കേഷന് സിപിഒ ബാലരാമപുരം മുക്കംപാലമൂട് വൈഗയില് ആര്. ബിജു(42)നാണ് മര്ദനമേറ്റത്.
രാവിലെ ഒന്പത് മണിയോടെ ബേക്കറി ജങ്ഷനിലാണ് സംഭവം. വീടിന്റെ മതില് ചാടിക്കടന്നുവെന്നാരോപിച്ചാണ് സെല്വരാജിന്റെ നേതൃത്വത്തിലുള്ള സംഘം ബിജുവിനെ നടുറോഡില് അക്രമിച്ചത്. സെല്വരാജിന്റെ നേതൃത്വത്തില് അതിക്രൂരമായി മര്ദിക്കുകയായിരുന്നു. അക്രമത്തിന്റെ വീഡിയോയും പുറത്തുവന്നു. സെല്വരാജും സംഘവും വടിഉപയോഗിച്ച് തലയില് മര്ദിക്കുന്നുണ്ട്. കുനിച്ചുനിര്ത്തി ഇടിച്ചും ചവിട്ടിയും അവശനാക്കി. അതിനുശേഷം ബിജുവിനെ സുരക്ഷാവേലിക്ക് മുകളിലൂടെ വലിച്ചെറിയുന്നതും വീഡിയോയിലുണ്ട്. വീട്ടിനുള്ളില് അതിക്രമിച്ചു കടന്നതിന് ബിജുവിനെതിരെയും കേസെടുത്തിട്ടുണ്ട്.
