ലക്നൗ: കുപ്രസിദ്ധ ഗുണ്ടാത്തലവന് സഞ്ജീവ് മഹേശ്വരി എന്ന ജീവയെ അജ്ഞാതരായ അക്രമികള് വെടിവെച്ചുകൊന്നു. ലക്നൗവിലെ എസ്സി/എസ്ടി കോടതിക്കുള്ളിലാണ് സംഭവം. ആക്രമണത്തില് ഒരു പൊലീസുകാരനും ആറുവയസുകാരിക്കും പരിക്കേറ്റു.
അക്രമികളില് ഒരാളായ വിജയ് യാദവിനെ പൊലീസ് പിടികൂടി.ഇയാളെ ചോദ്യം ചെയ്തു വരികയാണ്.
പടിഞ്ഞാറന് ഉത്തര്പ്രദേശിലെ അധോലോക കുറ്റവാളിയായിരുന്നു ജീവ എന്ന സഞ്ജീവ് മഹേശ്വരി. മുക്താര് അന്സാരി, മുന്ന ബജ്റംഗി സംഘങ്ങളുമായി ഇയാള്ക്ക് ബന്ധമുണ്ടായിരുന്നു. കഴിഞ്ഞ കുറേ ദിവസങ്ങളായി ലക്നൗ ജയിലില് കഴിയുന്ന ഇയാളെ ഒരു കേസുമായി ബന്ധപ്പെട്ട് കോടതിയില് ഹാജരാക്കുകയായിരുന്നു.
2018ല് ബാഗ്പത് ജയിലില് മുന്ന ബജ്റംഗിയെ കൊലപ്പെടുത്തിയതിന് പിന്നാലെ ജീവ തന്റെ ജീവന് ഭീഷണി ഉണ്ടെന്ന് പറഞ്ഞിരുന്നു.ബിജെപി എംഎല്എ കൃഷ്ണാനന്ദ് റായിയുടെ കൊലപാതകത്തില് ഇയാളുടെ പങ്ക് പുറത്തുവന്നിരുന്നു.
ഗാസിപൂര് ജില്ലയിലെ മൊഹമ്മദാബാദ് മണ്ഡലത്തില് നിന്നുള്ള എംഎല്എയായിരുന്ന കൃഷ്ണാനന്ദ് റായിയെ 2005-ല് എകെ 47 തോക്കുകളുമായെത്തിയ ഒരു സംഘം അക്രമികള് വെടിവച്ച് കൊലപ്പെടുത്തുകയായിരുന്നു. കൊലയ്ക്ക് പിന്നില് മുക്താര് അന്സാരിയും സഹോദരന് അഫ്സല് അന്സാരിയുമാണെന്നാണ് കേസ്.
