കോഴിക്കോട്: ബിരുദ വിദ്യാർത്ഥിനിയെ ലഹരി മരുന്ന് നൽകി ലൈംഗികമായി പീഡിപ്പിച്ച ശേഷം വഴിയിൽ ഉപേക്ഷിച്ച കേസിലെ പ്രതി ജിനാഫ് പന്തിരിക്കര ഇര്ഷാദ് വധക്കേസിലെ പ്രതി. പേരാമ്പ്ര പന്തിരിക്കര സൂപ്പിക്കടയിലെ ഇര്ഷാദിനെ സ്വര്ണ്ണക്കടത്ത് സംഘം തട്ടിക്കൊണ്ടുപോയി പിന്നീട് കടപ്പുറത്ത് മരിച്ച നിലയില് കണ്ടെത്തുകയായിരുന്നു. ഈ കേസിലെ ഏഴാം പ്രതിയാണ് ജിനാഫ്.
കൽപ്പറ്റ സ്വദേശിയായ ജിനാഫ് തമിഴ് നാട്ടിൽ ഒളിവിൽ കഴിയവേയാണ് പോലീസിന്റെ പിടിയിലായത്. പത്തൊമ്പതുകാരിയായ ബിരുദ വിദ്യാര്ഥിനിയെ സൗഹൃദം നടിച്ച് കാറില് കയറ്റിക്കൊണ്ടുപോയി എറണാകുളത്തെത്തിച്ച് പീഡിപ്പിച്ചശേഷം താമരശ്ശേരി ചുരത്തില് ഇറക്കിവിടുകയായിരുന്നു. കഴിഞ്ഞ ചൊവ്വാഴ്ചയാണ് പെണ്കുട്ടിയെ കാണാതായത്. വീട്ടിലേക്ക് പോകുകയാണെന്ന് പറഞ്ഞ് ഹോസ്റ്റലില്നിന്ന് ഇറങ്ങിയതായിരുന്നു പെണ്കുട്ടി. തിരിച്ചെത്താത്തതിനെ തുടര്ന്ന് ഹോസ്റ്റല് അധികൃതര് വീട്ടിലേക്ക് വിളിച്ചപ്പോഴാണ് അവിടെ എത്തിയിട്ടില്ലെന്ന് മനസിലായത്. തുടര്ന്ന് പിതാവ് പോലീസില് പരാതി നല്കുകയായിരുന്നു.
വ്യാഴാഴ്ച രാത്രി പോലീസ് പട്രോളിംഗിനിടെ ഒന്പതാം വളവില് നിന്നാണ് പെണ്കുട്ടിയെ കണ്ടെത്തിയത്. തുടർന്ന് നടന്ന അന്വേഷണത്തിലാണ് പീഡന വിവരം പുറത്ത് അറിയുന്നത്.
