ക്വാലാലംപൂര്: മലേഷ്യ മാസ്റ്റേഴ്സില് ഇന്ത്യയുടെ മുന്നിര താരങ്ങളായ പിവി സിന്ധു, കിദംബി ശ്രീകാന്ത്, എച്ച്എസ് പ്രണോയ്, ലക്ഷ്യ സെന് എന്നിവര് അടുത്ത റൗണ്ടിലേക്ക് മുന്നേറി. വനിതാ സിംഗിള്സ് ആദ്യ റൗണ്ട് മത്സരത്തില് രണ്ട് തവണ ഒളിമ്പിക് മെഡല് ജേതാവായ സിന്ധു ഡെന്മാര്ക്കിന്റെ ലൈന് ക്രിസ്റ്റഫേഴ്സനെതിരേ വിജയിച്ചു. ആറാം സീഡായ സിന്ധു ക്വാര്ട്ടര് ഫൈനലില് ഇടം കണ്ടെത്താന് ഇന്ന് ജപ്പാന്റെ അയ ഒഹോറിയെ നേരിടും.
ആദ്യ റൗണ്ടിലെ പുരുഷ സിംഗിള്സ് മത്സരത്തില് കിദംബി ശ്രീകാന്ത് ഫ്രാന്സിന്റെ ടോമ ജൂനിയര് പോപോവിനെ പരാജയപ്പെടുത്തി. അടുത്ത റൗണ്ടില് ഇന്ന് എട്ടാം സീഡ് കുന്ലാവുട്ട് വിറ്റിഡ്സാറിനെ നേരിടും. പ്രണോയ് ആറാം സീഡ് തായ്വാന് താരം ചൗ ടിയെന് ചെനെ പരാജയപ്പെടുത്തിയപ്പോള് ലക്ഷ്യ സെന് സിംഗപ്പൂരിന്റെ ലോഹ് കീന് യൂവിനെ പരാജയപ്പെടുത്തി.
പ്രണോയ് അടുത്തതായി ഓള് ഇംഗ്ലണ്ട് ഓപ്പണ് ചാമ്പ്യന് ചൈനയുടെ ലി ഷി ഫെംഗുമായി മത്സരിക്കും. ലക്ഷ്യ ഇന്ന് ഹോങ്കോങ്ങിന്റെ ആംഗസ് എന്ഗ് കാ ലോങ്ങിനെ നേരിടും.
വനിതാ സിംഗിള്സ് മത്സരങ്ങളില് പരാജയപ്പെട്ട ഇന്ത്യയുടെ മാളവിക ബന്സോദ്, ആകര്ഷി കശ്യപ്, അഷ്മിത ചലിഹ എന്നിവര് ടൂര്ണമെന്റില് നിന്ന് പുറത്തായി.
