കോട്ടയം: നിലമ്പൂര്‍-കൊച്ചുവേളി രാജ്യറാണി എക്സ്പ്രസില്‍ യുവതിയോട് അപമര്യാദയായി പെരുമാറിയ ടിടിഇ, തിരുവനന്തപുരം സ്വദേശി നിധീഷിനെ (35) കോട്ടയം റെയില്‍വേ പോലീസ് അറസ്റ്റു ചെയ്തു. സംഭവസമയം ടിടിഇ മദ്യപിച്ചിരുന്നതായി പരിശോധനയില്‍ കണ്ടെത്തി.
ഇന്നലെ പുലര്‍ച്ചെ ഒരു മണിയോടെ നിലമ്പൂരില്‍ നിന്നുമാണ് യുവതി രാജ്യറാണി എക്സ്പ്രസ്സില്‍ കയറിയത്. ആലുവ കഴിഞ്ഞപ്പോഴാണ് ടിടിഇ യുവതിയോട് മോശമായി പെരുമാറിയത്. എസ് 4 കോച്ചില്‍ യാത്ര ചെയ്ത യുവതിയോട് എസി കോച്ചിലേക്ക് മാറാമെന്ന് നിധീഷ് പറഞ്ഞു. മാറാന്‍ യുവതി തയാറായില്ല. ഇതോടെ കൈയില്‍ പിടിച്ച് കൊണ്ടുപോകാന്‍ ശ്രമിച്ചെന്നാണ് പരാതി.
തുടര്‍ന്ന് യുവതി തിരുവനന്തപുരം പോലീസ് കണ്‍ട്രോള്‍ റൂമിലേക്കും റെയില്‍വേ പോലീസ് കണ്‍ട്രോള്‍ റൂമിലേക്കും ഫോണിലൂടെ പരാതി അറിയിച്ചു. കോട്ടയത്ത് വച്ച് ടിടിഇയെ അറസ്റ്റ് ചെയ്തു. ഇയാള്‍ മദ്യപിച്ചിരുന്നതായി പരിശോധനയില്‍ തെളിഞ്ഞു.
സംഭവത്തില്‍ ശക്തമായ നടപടിയെടുക്കാനാണ് പോലീസിനോട് തിരുവനന്തപുരം റെയില്‍വേ സൂപ്രണ്ട് നിര്‍ദേശിച്ചിട്ടുള്ളത്. ഇയാള്‍ക്കെതിരെ ജാമ്യമില്ലാ വകുപ്പുകള്‍ പ്രകാരമാണ് കേസെടുത്തിട്ടുള്ളത്.
ജന്മഭൂമി ഓണ്‍ലൈന്‍