കണ്ണൂര്: ലോറി ഡ്രൈവര് ക്ലീനറെ ജാക്കി ലിവർ കൊണ്ട് അടിച്ചുകൊന്നു. പേരാവൂര് പോലീസ് സ്റ്റേഷന് പരിധിയില് നിടുംപൊയിലിന് സമീപം മാനന്തവാടി ചുരത്തിൽ ചൊവ്വാഴ്ച പുലർച്ചെ 4.30ഓടെയാണ് സംഭവം. കൊല്ലം പത്തനാപുരം സ്വദേശി സിദ്ദിഖാ(28)ണ് കൊല്ലപ്പെട്ടത്. മൃതദേഹം റോഡരികില് ഉപേക്ഷിച്ച് പോയ ലോറി ഡ്രൈവര് പത്തനാപുരം സ്വദേശി നിഷാദ്(29) കണ്ണവം പോലീസ് സ്റ്റേഷനില് കീഴടങ്ങി.
ആന്ധ്രയില് നിന്നും സിമന്റ് ലോഡുമായി കൂത്തുപറമ്പിലേക്ക് വരികയായിരുന്നു ഇരുവരും. ഇതിനിടെ സിദ്ദിഖും നിഷാദും തമ്മില് വാക്കേറ്റം ഉണ്ടാവുകയായിരുന്നു. തുടർന്നാണ് നിഷാദ് ജാക്കി ലിവര് ഉപയോഗിച്ച് സിദ്ദിഖിനെ അടിച്ചത്. മൃതദേഹം പേരാവൂര് താലൂക്കാശുപത്രി മോർച്ചറിയിലേക്ക് മാറ്റി. പോസ്റ്റുമോർട്ടം നടപടികൾ പൂർത്തിയാക്കിയശേഷം മൃതദേഹം ബന്ധുക്കൾക്ക് വിട്ടുനൽകും.
സംഭവം അറിഞ്ഞ് സിദ്ദിഖിന്റെ ബന്ധുക്കൾ പത്തനാപുരത്തുനിന്ന് കണ്ണൂരിലേക്ക് തിരിച്ചിട്ടുണ്ട്. നിഷാദിനെ ഇന്നുതന്നെ കോടതിയിൽ ഹാജരാക്കുമെന്ന് പോലീസ് വൃത്തങ്ങൾ അറിയിച്ചു.
