വയനാട്: കടബാധ്യതയെ തുടർന്ന് വയനാട്ടിൽ കര്ഷകൻ ജീവനൊടുക്കി. ചെന്നലോട് പുത്തൻപുരയിൽ ദേവസ്യ(49) എന്ന സൈജനാണ് മരിച്ചത്. ബുധനാഴ്ച്ച പുലർച്ചെയാണ് മരണം. വിഷം കഴിച്ച് ഗുരുതരാവസ്ഥയിലായിരുന്ന ഇദ്ദേഹം കൽപറ്റയിലെ സ്വകാര്യ ആശുപത്രിയിൽ ചികിത്സയിലായിരുന്നു.
വിഷം അകത്തുചെന്ന് അവശനിലയിൽ വീടിന് സമീപത്തെ വയലിലാണ് ദേവസ്യയെ കണ്ടെത്തിയത്. ഇന്ന് പുലർച്ചെ മാനന്തവാടി മെഡിക്കൽ കോളേജ് ആശുപത്രിയിൽ വച്ചായിരുന്നു മരണം. വിവിധ ബാങ്കുകളിലും മറ്റുമായി 17 ലക്ഷത്തിലധികം രൂപയുടെ കടബാധ്യതയുണ്ട്. കഴിഞ്ഞ ദിവസം വേനൽ മഴയിലും കാറ്റിലും അറുനൂറോളം നേന്ത്രവാഴകൾ നശിച്ചിരുന്നു വാഴ കൃഷി നശിച്ചതോടെ വലിയ മനോവിഷമത്തിലായിരുന്നുവെന്നും ബന്ധുക്കൾ പറഞ്ഞു.
രണ്ട് പെണ്മക്കളാണ് ദേവസ്യയ്ക്ക് ഉള്ളത്. ഇവരുടെ വിദ്യാഭ്യാസ ആവശ്യങ്ങൾക്ക് വേണ്ടിയും വായ്പ എടുത്തിരുന്നു.
