തൃശൂര്: ഇത്തവണത്തെ തൃശൂര് പൂരത്തിന് സമാപനം. തിരുവമ്പാടി ,പാറമേക്കാവ് ഭഗവതിമാര് ഉപചാരം ചൊല്ലി പിരിഞ്ഞതോടെയാണ് 36 മണിക്കൂര് നീണ്ട തൃശൂര് പൂരത്തിന്റെ ചടങ്ങുകള്ക്ക് പരിസമാപതിയായത് .അടുത്ത വര്ഷത്തെ പൂരാഘോഷം 2024 ഏപ്രില് 19നാണ് .
പൂരത്തില് പങ്കെടുക്കാന് ജനസാഗരം തന്നെയാണ് തേക്കിന്കാട് മൈതാനിയിലെത്തിയത്. തിരുവമ്പാടി ചന്ദ്രശേഖരനാണ് തിരുവമ്പാടി ഭഗവതിയുടെ തിടമ്പേറ്റിയത്.
എറണാകുളം ശിവകുമാര് പാറമേക്കാവ് ഭഗവതിയുടെ തിടമ്പേറ്റി.വടക്കുംനാഥനെ വണങ്ങി പടിഞ്ഞാറെ നടയിലൂടെയാണ് ചന്ദ്രശേഖരന് ശ്രീമൂല സ്ഥാനത്തെത്തിയത്.
നടുവിലാല് ഗണപതിയെ വലംവച്ച് ഇതേസമയം ശിവകുമാറും ശ്രീമൂലസ്ഥാനത്തെത്തി. തുടര്ന്ന് ഇരു ആനകളും തുമ്പിക്കൈ ഉയര്ത്തി പരസ്പരം ഉപചാരം ചൊല്ലി.
പാറമേക്കാവ് വിഭാഗം എഴുന്നള്ളിപ്പ് മണികണ്ഠനാല് ഭാഗത്തുനിന്ന് തുടങ്ങി. 15 ആനകളുണ്ടായിരുന്നു.കിഴക്കൂട്ട് അനിയന്മാരാരുടെ നേതൃത്വത്തില് മേളവും ഒപ്പം കുടമാറ്റവും നടന്നു. ഇന്നലെ നടന്ന കുടമാറ്റത്തിന്റെ ചെറു പതിപ്പായിരുന്നു ഇത്.
തിരുവമ്പാടി വിഭാഗം എഴുന്നള്ളിപ്പ് നായ്ക്കനാല് ഭാഗത്തുനിന്ന് തുടങ്ങി. 14 ആനകളാണ നിരന്നത്. ചേരാനെല്ലൂര് ശങ്കരന്കുട്ടി മാരാരുടെ നേതൃത്വത്തിലായിരുന്നു മേളം . ഇരുഭാഗത്തും മേളവും കുടമാറ്റവും ഉണ്ടായിരുന്നു. സ്ത്രീകള് കൂടുതലും എത്തുന്നത് ഈ പകല്പ്പൂരത്തിനാണ്.
