ചെന്നൈ: ഐപിഎല് ക്രിക്കറ്റില് ഇന്ന് രണ്ട് മത്സരങ്ങള്. ചെന്നൈയിലെ എംഎ ചിദംബരം സ്റ്റേഡിയത്തില് ഉച്ചയ്ക്ക് ശേഷം 3.30ന് പഞ്ചാബ് കിംഗ്സിനെയാണ് ചെന്നൈ സൂപ്പര് കിംഗ്സ് നേരിടുന്നത്. മറ്റൊരു മത്സരത്തില് മുംബൈ ഇന്ത്യന്സും രാജസ്ഥാന് റോയല്സും മുംബൈയിലെ വാങ്കഡെ സ്റ്റേഡിയത്തില് വൈകിട്ട് 7.30ന് ഏറ്റുമുട്ടും.
കഴിഞ്ഞ രാത്രി ദല്ഹിയിലെ അരുണ് ജെയ്റ്റ്ലി സ്റ്റേഡിയത്തില് നടന്ന ആവേശകരമായ മത്സരത്തില് സണ്റൈസേഴ്സ് ഹൈദരാബാദ് ഡല്ഹി ക്യാപിറ്റല്സിനെ 9 റണ്സിന് പരാജയപ്പെടുത്തി. 198 റണ്സ് വിജയലക്ഷ്യം പിന്തുടര്ന്ന ദല്ഹി ക്യാപിറ്റല്സ് നിശ്ചിത 20 ഓവറില് 6 വിക്കറ്റ് നഷ്ടത്തില് 188 റണ്സില് ഒതുങ്ങി.
ഇന്നലെ നടന്ന മറ്റൊരു മത്സരത്തില് കൊല്ക്കത്തയിലെ ഈഡന് ഗാര്ഡന്സില് ഗുജറാത്ത് ടൈറ്റന്സ് ഏഴു വിക്കറ്റിന് കൊല്ക്കത്ത നൈറ്റ് റൈഡേഴ്സിനെ പരാജയപ്പെടുത്തി. അദ്യം ബാറ്റ് ചെയ്ത കൊല്ക്കത്ത നിശ്ചിത 20 ഓവറില് ഏഴ് വിക്കറ്റ് നഷ്ടത്തില് 179 റണ്സ് നേടി. മറുപടി ബാറ്റിംഗില് ഗുജറാത്ത് ടൈറ്റന്സ് 17.5 ഓവറില് മൂന്ന് വിക്കറ്റ് നഷ്ടത്തില് 180 റണ്സ് നേടി.
